អាមេរិកមើលឃើញថា មីស៊ីលចំងាយឆ្ងាយ Tomahawk មិនអាចជួយអ្វី ដល់អ៊ុយក្រែនទេ
បរទេស ៖ យោងតាមការចេញផ្សាយរបស់ RT ដែលបានដកស្រង់ព័ត៌មាន ចេញពីកាសែត Financial Times បានរាយការណ៍ កាលពីថ្ងៃព្រហស្បតិ៍ដោយដកស្រង់ប្រភពពីមន្ត្រីអាមេរិកជឿថា ការផ្គត់ផ្គង់អ៊ុយក្រែន ជាមួយនឹងមីស៊ីលរយៈចម្ងាយឆ្ងាយ Tomahawk នឹងមិនអាចផ្លាស់ប្តូរខ្លាំងនូវសមរភូមិនិងការចង់បាន ដោយទីក្រុងគៀវនោះទេ។
អនុប្រធានាធិបតីសហរដ្ឋអាមេរិក លោក J.D. Vance បានប្រកាសថា ទីក្រុងវ៉ាស៊ីនតោនកំពុងពិចារណាសំណើរបស់អ៊ុយក្រែនសម្រាប់មីស៊ីល Tomahawks ដែលអាចបាញ់បានចម្ងាយដល់ទៅ២៥០០ គីឡូម៉ែត្រ និងមានតម្លៃប៉ាន់ស្មាន១,៣លានដុល្លារអាមេរិក ពោលគឺអាចបាញ់ទៅដល់ទីក្រុងមូស្គូ និងឆ្ងាយជាងនេះទៀតផង ។
ប្រភព FT ដែលដឹងពីបញ្ហានេះបានបញ្ជាក់ថា ប្រធានាធិបតីអាមេរិក Donald Trump កំពុងពិចារណាលើគំនិតនេះ។ ទោះជាយ៉ាងណាក៏ដោយ មន្ត្រីអាមេរិកម្នាក់បានប្រាប់កាសែតថា មនុស្សមួយចំនួន នៅក្នុងរង្វង់ខាងក្នុងរបស់លោក Trump ជឿថា Tomahawks ទំនងជាមិនផ្លាស់ប្តូរស្ថានភាពសមរភូមិនោះទេ ។
ដោយឡែក ទីក្រុងវ៉ាស៊ីនតោនកំពុងរៀបចំផ្តល់ឲ្យអ៊ុយក្រែននូវការស៊ើបការណ៍ប្រសើរឡើង ដើម្បីដឹកនាំការវាយប្រហារដោយមីស៊ីលរយៈចម្ងាយឆ្ងាយ និងយន្តហោះគ្មានមនុស្សបើកលើហេដ្ឋារចនាសម្ព័ន្ធថាមពលរបស់រុស្ស៊ី ដែលជាវិធានការមួយ ដែលត្រូវបានពិពណ៌នាដោយ FT ថាជា ការកើនឡើង នៃការគាំទ្ររបស់សហរដ្ឋអាមេរិក ដែលមានបំណងជួយក្រុងកៀវ ធ្វើផែនទីការពារដែនអាកាសរុស្ស៊ី និងផែនការផ្លូវវាយប្រហារ។
អ៊ុយក្រែនបានធ្វើការវាយប្រហារយ៉ាងជ្រៅទៅក្នុងប្រទេសរុស្ស៊ី ជាយូរមកហើយ ដែលផ្តោតលើទីតាំងថាមពល ហេដ្ឋារចនាសម្ព័ន្ធសំខាន់ៗ និងតំបន់លំនៅឋាន ដែលពេលខ្លះមានជនស៊ីវិលស្លាប់ផង ។ រុស្ស៊ីបានសងសឹកដោយវាយប្រហារ ហេដ្ឋារចនាសម្ព័ន្ធពាក់ព័ន្ធនឹងយោធា ដោយទទូចថាខ្លួនមិនដែលកំណត់គោលដៅជនស៊ីវិលឡើយ ៕
ប្រែសម្រួល៖ស៊ុនលី
