វេណេស៊ុយអេឡា ថ្កោលទោសការលុកលុយខុសច្បាប់ដោយយន្តហោះចម្បាំងអាមេរិក
ការ៉ាកាស៖ ក្រសួងការពារជាតិ និងក្រសួងការបរទេសរបស់ប្រទេសវេណេស៊ុយអេឡា បានថ្កោលទោសចំពោះការលុកលុយខុសច្បាប់របស់យន្តហោះចម្បាំងរបស់សហរដ្ឋអាមេរិក។
សេចក្តីថ្លែងការណ៍របស់រដ្ឋមន្ត្រីការបរទេស លោក Yvan Gil បានឧ្យដឹងនៅលើប្រព័ន្ធផ្សព្វផ្សាយសង្គមថា យន្តហោះនេះត្រូវបានគេរកឃើញនៅថ្ងៃទី២ ខែតុលា ឆ្នាំ២០២៥ ដែលមានចម្ងាយប្រហែល ៧៥គីឡូម៉ែត្រពីឆ្នេរសមុទ្ររបស់យើង។
លោកបានលេីកឡេីងថា សម្រាប់ប្រទេសវេណេស៊ុយអេឡា ទង្វើនេះ “បង្កើតជាការញុះញង់ដែលគំរាមកំហែងដល់អធិបតេយ្យភាពជាតិ” និងបំពានច្បាប់អន្តរជាតិ និងអនុសញ្ញា ស្តីពីអាកាសចរណ៍ស៊ីវិលអន្តរជាតិ។
លោកបន្ដថា សមយុទ្ធនេះ “ធ្វើឱ្យមានហានិភ័យ” ដល់សុវត្ថិភាពនៃអាកាសចរណ៍នៅសមុទ្រការីប៊ីន ដោយបន្ថែមថា ការលុកលុយផ្សេងទៀតត្រូវបានរកឃើញ។
មុននេះ រដ្ឋមន្ត្រីការពារជាតិវេណេស៊ុយអេឡា លោក Vladimir Padrino Lopez បានបរិហារការដាក់ពង្រាយយន្តហោះចម្បាំងអាមេរិក និង “ការយាយីយោធា ការគំរាមកំហែងយោធា របស់រដ្ឋាភិបាលសហរដ្ឋអាមេរិក ប្រឆាំងនឹងប្រជាជនវេណេស៊ុយអេឡា ដែលចង់បានសន្តិភាព ការងារ និងសុភមង្គល”៕
ប្រែសម្រួល ឈូក បូរ៉ា
