អភិបាលក្រុងពោធិ៍សាត់ ដឹកនាំកិច្ចប្រជុំ ណែនាំពង្រឹងការងារអនាម័យ និងសណ្តាប់ធ្នាប់ សាធារណៈនៅទូទាំង ៧ សង្កាត់ !
ពោធិ៍សាត់ ៖ នៅព្រឹកទី ៦ ខែតុលា ឆ្នាំ ២០២៥ នេះ លោក ផាយ ឡេង អភិបាល នៃគណៈអភិបាលក្រុងពោធិ៍សាត់ បានដឹកនាំកិច្ចប្រជុំមួយ ដើម្បីដាក់ចេញនូវវិធានការណែនាំ និងពង្រឹងការរៀបចំ អនាម័យ និង សណ្តាប់ធ្នាប់សាធារណៈ នៅតាមបណ្តាសង្កាត់ទាំង ៧ ក្នុងភូមិសាស្ត្រក្រុងពោធិ៍សាត់ ។
កិច្ចប្រជុំដ៏សំខាន់នេះ គឺមានការចូលរួមពីអាជ្ញាធរសង្កាត់ទាំង ៧ និងមន្ត្រីជំនាញពាក់ព័ន្ធ ដើម្បីពិនិត្យ និងវាយតម្លៃលើបញ្ហាប្រឈមនានា ទាក់ទងនឹងការគ្រប់គ្រងសំរាម ការរៀបចំសោភ័ណភាព និងការអនុវត្តច្បាប់ស្តីពីសណ្តាប់ធ្នាប់សាធារណៈ។
គោលបំណងសំខាន់ៗនៃកិច្ចប្រជុំ
ថ្លែងក្នុងកិច្ចប្រជុំ លោកអភិបាលក្រុង ផាយ ឡេង បានសង្កត់ធ្ងន់ថា ក្រុងពោធិ៍សាត់ត្រូវតែមានបរិស្ថានស្អាត និងរបៀបរៀបរយល្អ ដើម្បីឆ្លើយតប ទៅនឹងគោលនយោបាយ របស់រាជរដ្ឋាភិបាល និងត្រៀមខ្លួន សម្រាប់ព្រឹត្តិការណ៍សំខាន់ៗ នាពេលខាងមុខ ។ លោកបានដាក់ចេញ នូវចំណុចគន្លឹះមួយចំនួន៖
-ពង្រឹងការគ្រប់គ្រងសំរាម: ណែនាំឲ្យអាជ្ញាធរសង្កាត់ បង្កើនការអប់រំប្រជាពលរដ្ឋ ឲ្យវេចខ្ចប់សំរាមត្រឹមត្រូវ និងទម្លាក់សំរាមត្រូវម៉ោង ក៏ដូចជាចាត់វិធានការ លើការបោះចោលសំរាមពាសវាលពាសកាល ។
-រៀបចំសណ្តាប់ធ្នាប់ចិញ្ចើមផ្លូវ: ជំរុញឲ្យមានការត្រួតពិនិត្យ និងរៀបចំតូបលក់ដូរ យានយន្ត និងសម្ភារផ្សេងៗ ដែលដាក់រំលោភលើចិញ្ចើមផ្លូវសាធារណៈ ដោយត្រូវអនុវត្តតាមគោលការណ៍ មេត្តាធម៌ រួមផ្សំជាមួយ វិធានការច្បាប់។
- លើកកម្ពស់សោភ័ណភាពមូលដ្ឋាន: ជំរុញឲ្យមានការដាំដើមឈើលម្អ សម្អាតបរិវេណផ្ទះ និងទីសាធារណៈឲ្យបានស្អាត និងភ្លឺថ្លា។
លោក ផាយ ឡេង ក៏បានបន្ថែមថា អាជ្ញាធរសង្កាត់ គឺជាសេនាធិការដ៏សំខាន់ក្នុងការអនុវត្តការងារនេះ ហើយត្រូវសហការយ៉ាងជិតស្និទ្ធជាមួយប្រជាពលរដ្ឋ និងអង្គភាពជំនាញពាក់ព័ន្ធ ដើម្បីធានាថាការណែនាំទាំងអស់នេះត្រូវបានអនុវត្តប្រកបដោយប្រសិទ្ធភាព និងនិរន្តរភាព។
ទិសដៅអនុវត្តបន្ទាប់
ក្រោយបញ្ចប់កិច្ចប្រជុំ អាជ្ញាធរសង្កាត់នីមួយៗបានប្តេជ្ញាចិត្ត នឹងបន្តចុះផ្សព្វផ្សាយ និងអនុវត្តសេចក្តីណែនាំនេះទៅដល់មូលដ្ឋានរៀងៗខ្លួនឲ្យបានផុសផុល ដោយចាប់ផ្តើមអនុវត្តវិធានការនានា ចាប់ពីពេលនេះតទៅ ដើម្បីប្រែក្លាយក្រុងពោធិ៍សាត់ឲ្យទៅជាទីក្រុងស្អាត មានសោភ័ណភាព និងសណ្តាប់ធ្នាប់ល្អប្រសើរ ៕
ប្រភព&រូបភាព÷រដ្ឋបាលក្រុងពោធិ៍សាត់
ដោយ÷ហ៊ុន ធឿន(ដើមអម្ពិល)
