រដ្ឋ Illinois និងទីក្រុង Chicago របស់អាមេរិក ប្តឹងប្រធានាធិបតី Donald Trump ដើម្បីរារាំងការដាក់ពង្រាយកងទ័ពឆ្មាំជាតិសហព័ន្ធ
បរទេស៖ រដ្ឋ Illinois និងទីក្រុង Chicago របស់អាមេរិក កាលពីថ្ងៃចន្ទ បានប្តឹងប្រធានាធិបតី Donald Trump ដោយស្វែងរកការរារាំងការដាក់ពង្រាយកងទ័ពឆ្មាំជាតិសហព័ន្ធទៅកាន់ទីក្រុង Chicago ខណៈដែលកងទ័ពឆ្មាំជាតិរាប់រយនាក់មកពីរដ្ឋតិចសាស់ បានធ្វើដំណើរទៅកាន់ទីក្រុងធំបំផុតទីបីរបស់សហរដ្ឋអាមេរិកនេះ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៧ ខែតុលា ឆ្នាំ២០២៥ បានឱ្យដឹងថា បន្ទាប់មកលោក Trump បានបង្កើនការប៉ះទង្គិចកាន់តែធំជាមួយរដ្ឋ និងទីក្រុងដែលដឹកនាំដោយអ្នកប្រជាធិបតេយ្យ ជុំវិញការប្រើប្រាស់កងកម្លាំងយោធាក្នុងស្រុក ដោយគំរាមប្រើច្បាប់បង្ក្រាបការបះបោរជាមធ្យោបាយមួយដើម្បីគេចចេញពីការរឹតបន្តឹងរបស់តុលាការលើការដាក់ពង្រាយកងទ័ពនៅកន្លែងដែលពួកគេមិនចង់បានដោយមន្ត្រីក្នុងតំបន់។
រដ្ឋ Illinois បានប្តឹងជាការឆ្លើយតបទៅនឹងការបញ្ជារបស់ប្រធានមន្ទីរបញ្ចកោណលោក Pete Hegseth កាលពីចុងសប្តាហ៍ដើម្បីនាំយកសមាជិកឆ្មាំជាតិរដ្ឋ Illinois ចំនួន ៣០០ នាក់ នៅក្រោមការគ្រប់គ្រងរបស់សហព័ន្ធ ហើយបន្ទាប់មកដើម្បីប្រមូលកងទ័ពឆ្មាំជាតិរដ្ឋតិចសាស់ចំនួន ៤០០ នាក់ទៀតសម្រាប់ដាក់ពង្រាយទៅកាន់ទីក្រុង Chicago ។
ខណៈពេលដែលសំណើរបស់រដ្ឋ Illinois សម្រាប់ដីកាហាមឃាត់ជាបណ្តោះអាសន្ន អស់សុពលភាព មេធាវីរបស់សហរដ្ឋអាមេរិកបានប្រាប់សវនាការនៅថ្ងៃចន្ទថា ទាហានឆ្មាំជាតិរដ្ឋតិចសាស់ កំពុងធ្វើដំណើរទៅកាន់រដ្ឋរួចហើយ។ បន្ទាប់មក លោក Trump បានចេញអនុស្សរណៈមួយទៀត ដោយហៅកងទ័ពឆ្មាំជាតិ ៣០០នាក់ នៃរដ្ឋ Illinois ដោយពង្រឹងបទបញ្ជាមុនរបស់លោក Hegseth ៕
ប្រែសម្រួលៈ ណៃ តុលា
