រដ្ឋមន្ត្រីការបរទេសចិន អំពាវនាវឲ្យមានការបង្កើន ទំនាក់ទំនងកាន់តែមានស្ថេរភាព ជាមួយនឹងកាណាដា
បរទេស ៖ ទីភ្នាក់ងារចិនស៊ិនហួចេញផ្សាយ នៅថ្ងៃនេះបានឲ្យដឹងថារដ្ឋមន្ត្រីការបរទេសចិន លោក Wang Yi កាលពីថ្ងៃអង្គារ បានអំពាវនាវឱ្យប្រទេសចិន និងកាណាដា ដើម្បីចូលរួម ដោះស្រាយឱ្យបានត្រឹមត្រូវ នូវកង្វល់ស្របច្បាប់របស់គ្នាទៅវិញទៅមក ដើម្បីលើកកម្ពស់ការអភិវឌ្ឍប្រកបដោយសុខភាពល្អ ស្ថិរភាព និងនិរន្តរភាពនៃទំនាក់ទំនងចិន-កាណាដា ។
លោក Wang ដែលជាសមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តចិន បានធ្វើការអំពាវនាវនេះនៅក្នុងការសន្ទនា តាមទូរស័ព្ទជាមួយរដ្ឋមន្ត្រី ការបរទេស កាណាដា Anita Anand តាមសំណើរបស់ភាគីកាណាដា។
លោក Wang បាននិយាយថា មិនយូរប៉ុន្មានមុននេះ លោកប្រធានាធិបតី Xi Jinping និងនាយករដ្ឋមន្ត្រី Mark Carney បានបើកកិច្ចប្រជុំដ៏សំខាន់ មួយនៅទីក្រុង Gyeongju ប្រទេសកូរ៉េខាងត្បូង។
ភាគីទាំងពីរបានឈាន ដល់ការឯកភាពគ្នាដ៏សំខាន់ និងបានផ្តល់ការណែនាំ ជាយុទ្ធសាស្ត្រលើការកែលម្អ និងអភិវឌ្ឍទំនាក់ទំនងចិន-កាណាដា ដែលជាសញ្ញាបង្ហាញថា ទំនាក់ទំនងចិន-កាណាដាត្រូវបាននាំត្រឡប់ទៅរកផ្លូវ ត្រូវសម្រាប់ការរីកចម្រើនវិញ បន្ទាប់ពីមានវិបត្តិរយៈ ពេល៧ឆ្នាំកន្លងមកនេះ ។
លោក Wang បាននិយាយថា ប្រទេសចិន បានត្រៀមខ្លួនរួចជាស្រេចក្នុង ការពង្រឹងទំនាក់ទំនងជាមួយកាណាដា និងចាត់វិធានការប្រកបដោយប្រសិទ្ធភាព ដើម្បីពន្លឿនការបន្តការផ្លាស់ប្តូរ និងកិច្ច សហប្រតិបត្តិការក្នុងវិស័យផ្សេងៗ ដើម្បីពង្រឹងសន្ទុះសម្រាប់ទំនាក់ទំនងទ្វេភាគី ឱ្យកាន់តែរីកចម្រើនក្នុងលក្ខណៈជាក់ស្តែង និងស្ថាបនា៕
ប្រែសម្រួល៖ស៊ុនលី
