ចិន ជំរុញឱ្យប្រទេសជប៉ុន ពន្លឿនការបំផ្លាញអាវុធគីមី ដែលគេបោះបង់ចោល
ឡាអេ៖ ប្រទេសចិន បានអំពាវនាវឱ្យប្រទេសជប៉ុនពន្លឿនការបំផ្លាញអាវុធគីមី ដែលគេបោះបង់ចោល (ACWs) នៅក្នុងប្រទេសចិនក្នុងអំឡុងពេលសន្និសីទរដ្ឋភាគីនៃអង្គការហាមឃាត់អាវុធគីមី (OPCW) កាលពីថ្ងៃពុធនៅទីក្រុងឡាអេ ប្រទេសហូឡង់ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
នៅក្នុងសម័យប្រជុំនេះ គណៈប្រតិភូបានពិនិត្យឡើងវិញនូវការអនុវត្តការសម្រេចចិត្តរបស់សន្និសីទ និងក្រុមប្រឹក្សាប្រតិបត្តិលើបញ្ហាទាក់ទងនឹងការបំផ្លិចបំផ្លាញ។ ប្រទេសជប៉ុន បានដាក់ជូនរបាយការណ៍វឌ្ឍនភាពលើកិច្ចខិតខំប្រឹងប្រែងដកចេញនូវ ACW របស់ខ្លួននៅក្នុងប្រទេសចិន ដោយកត់សម្គាល់ថាការចំណាយរបស់ខ្លួនលើគម្រោងនេះក្នុងឆ្នាំ ២០២៥ បានធ្លាក់ចុះ ៦.៨ ភាគរយពីមួយឆ្នាំទៅមួយឆ្នាំ។
លោក Wang Daxue ប្រធានគណៈប្រតិភូចិនទៅកាន់សម័យប្រជុំលើកទី ៣០ នៃសន្និសីទរដ្ឋភាគីនៃអនុសញ្ញាអាវុធគីមី (CSP-30) បានឲ្យដឹងថា “របាយការណ៍នេះផ្តោតជាឯកតោភាគីលើវឌ្ឍនភាពនៃការបំផ្លិចបំផ្លាញ និងការវិនិយោគ ខណៈពេលដែលជៀសវាងការពិភាក្សាណាមួយអំពីបញ្ហាជាមូលដ្ឋាន”។
លោក បានសង្កត់ធ្ងន់ថា ក្រោមអនុសញ្ញានេះ ប្រទេសជប៉ុន គួរតែបានបញ្ចប់ការបំផ្លាញអាវុធគីមី ដែលគេបោះបង់ចោលនៅឆ្នាំ ២០២៧ ប៉ុន្តែថ្ងៃផុតកំណត់ត្រូវបានពន្យារពេលចំនួនបួនដង។ លោកបានសន្មតថា ការពន្យារពេលនេះបណ្តាលមកពី “ការយកចិត្តទុកដាក់មិនគ្រប់គ្រាន់ ការវិនិយោគមិនគ្រប់គ្រាន់ និងការខកខានមិនបានផ្តល់ព័ត៌មានដែលមានអត្ថន័យដោយស្ម័គ្រចិត្ត” របស់ប្រទេសជប៉ុន អំពីកន្លែងកប់អាវុធ។
ប្រទេសចិន បានព្រមានថា ACW របស់ជប៉ុននៅតែបន្តបង្កហានិភ័យយ៉ាងធ្ងន់ធ្ងរដល់អាយុជីវិត និងទ្រព្យសម្បត្តិរបស់ពលរដ្ឋចិន និងបរិស្ថាន។ ទីក្រុងប៉េកាំង បានជំរុញឱ្យទីក្រុងតូក្យូ យកចិត្តទុកដាក់យ៉ាងខ្លាំង ចំពោះកង្វល់របស់ប្រទេសចិន និងសហគមន៍អន្តរជាតិ ឆ្លុះបញ្ចាំងពីប្រវត្តិនៃការឈ្លានពានរបស់ខ្លួន គោរពការប្តេជ្ញាចិត្តរបស់ខ្លួន និងបង្កើនកិច្ចខិតខំប្រឹងប្រែងលើគ្រប់ទិដ្ឋភាពទាំងអស់នៃដំណើរការបំផ្លាញ។
ប្រទេសជាងដប់ រួមទាំងប្រទេសរុស្ស៊ី អាហ្វ្រិកខាងត្បូង និងទុយនីស៊ី បានសម្តែងការគាំទ្រ ចំពោះប្រទេសចិន និងបានអំពាវនាវឱ្យប្រទេសជប៉ុនពន្លឿនការបំផ្លាញអាវុធ។ លោកស្រី Mirjam Blaak Sow តំណាងអចិន្ត្រៃយ៍នៃប្រទេសអ៊ូហ្គង់ដាប្រចាំ OPCW បានថ្លែងក្នុងនាមចលនាមិនចូលបក្សសម្ព័ន្ធក្នុងអំឡុងពេលជជែកពិភាក្សាទូទៅកាលពីថ្ងៃអង្គារថា “វឌ្ឍនភាពរួមនៃការបំផ្លាញអាវុធគីមី ដែលបោះបង់ចោលដោយប្រទេសជប៉ុន នៅលើទឹកដីប្រទេសចិ នគឺតិចជាងការរំពឹងទុក”។ “យើងជំរុញឱ្យរដ្ឋភាគីខិតខំប្រឹងប្រែងឱ្យអស់ពីសមត្ថភាព ដើម្បីបញ្ចប់ការបំផ្លាញឱ្យបានឆាប់តា មដែលអាចធ្វើទៅបាន។ យើងក៏ទន្ទឹងរង់ចាំការត្រួតពិនិត្យ OPCW ឱ្យកាន់តែរឹងមាំលើដំណើរការនេះផងដែរ”៕
ប្រែសម្រួល ឈូក បូរ៉ា
