រដ្ឋបាលស្រុកកណ្តៀង ចេញសេចក្តីជូនដំណឹងស្តីពីការបាក់ច្រាំងស្ទឹង ២កន្លែងដោយសារគ្រោះទឹកជំនន់
ខេត្តពោធិ៍សាត់÷ រដ្ឋបាលស្រុកកណ្តៀង មានកិត្តិយសសូមជម្រាបជូនដំណឹងដល់សាធារណជន និងអ្នកធ្វើដំណើរ ទាំងអស់ តាមបណ្តោយស្ទឹងពោធិ៍សាត់ ក្នុងភូមិសាស្ត្រឃុំកណ្តៀង និងឃុំអន្លង់វិល ស្រុកកណ្តៀង ជ្រាបថា៖ បន្ទាប់ពីស្ថានភាពទឹកជំនន់ទឹកភ្លៀងបានស្រកចុះជាបន្តបន្ទាប់ ធ្វើឱ្យដីនៅតាមបណ្តោយច្រាំងស្ទឹងទាំងសងខាង នៅបន្តជោគទឹកនៅឡើយ។ ជាក់ស្តែងនៅថ្ងៃទី២៨ ខែវិច្ឆិកា ឆ្នាំ២០២៥នេះ មានករណីបាក់ច្រាំងស្ទឹងចំនួន ២កន្លែង ប្រវែងសរុប ១២៥ម៉ែត្រ ដែលមានទីតាំងដូចខាងក្រោម៖
១. ស្ថិតនៅតាមបណ្តោយផ្លូវកៅស៊ូលេខ ១៥៤ ត្រើយខាងលិច ត្រង់ចំណុចភូមិបឹងឈូក ឃុំកណ្តៀង បាក់ច្រាំងប្រវែង ៥០ម៉ែត្រ។
២. ស្ថិតនៅតាមបណ្តោយផ្លូវកៅស៊ូលេខ១៥២H ត្រើយខាងកើត ត្រង់ចំណុចភូមិក្បាលរមាស ឃុំអន្លង់វិល បាក់ច្រាំងប្រវែង ៧៥ម៉ែត្រ (បាក់តួផ្លូវកៅស៊ូពាក់កណ្តាល)។
វិធានការចំពោះមុខ រដ្ឋបាលស្រុក មន្ទីរសាធារណការ និងដឹកជញ្ជូនខេត្ត និងអាជ្ញាធរភូមិ ឃុំ បាន នឹងកំពុងសហការដាក់ស្លាកសញ្ញាសំគាល់គ្រោះថ្នាក់ និងរនាំងពង្វាងចរាចរណ៍ ដើម្បីបញ្ចៀសគ្រោះថ្នាក់ កើតមានជាយថាហេតុ។ ជាមួយគ្នានេះ រដ្ឋបាលស្រុក សូមអំពាវនាវដល់បងប្អូនប្រជាពលរដ្ឋទាំងអស់ សូមបង្កើនការប្រុងប្រយ័ត្នខ្ពស់ នៅពេលធ្វើដំណើរមកដល់គោលដៅដូចបានជម្រាបជូនខាងលើ ជាពិសេស នៅត្រង់ចំណុចផ្លូវកៅស៊ូលេខ១៥២H ស្ថិតក្នុងភូមិក្បាលរមាស ឃុំអន្លង់វិល រដ្ឋបាលស្រុកសម្រេចផ្អាកការធ្វើ ចរាចរណ៍ជាបណ្តោះអាសន្នចំពោះរថយន្តដឹកជញ្ជូនធុនធ្ងន់ទាំងស្រុង គិតចាប់ពីថ្ងៃជូនដំណឹងនេះតទៅ រហូត ដល់ការជួសជុលស្ថាបនាផ្លូវបានល្អប្រសើរឡើងវិញ។ ការធ្វើចរាចរណ៍អាចអនុញ្ញាតជូនបានតែមធ្យោបាយខ្នាតតូច ដូចជា រថយន្តគ្រួសារ, រ៉ឺម៉ក, គោយន្ត, ម៉ូតូ, កង់ ដោយកម្រិតទម្ងន់អតិបរមាត្រឹម ៥តោនចុះក្រោម ក្នុងករណី មិនអនុវត្តតាមការជូនដំណឹងនេះ កម្លាំងសមត្ថកិច្ចដែលប្រចាំការនៅគោលដៅ នឹងចាប់ឃាត់ទុកមធ្យោបាយ ដើម្បីចាត់ការទៅតាមផ្លូវច្បាប់។
រដ្ឋបាលស្រុកកណ្តៀង សង្ឃឹមជឿជាក់លើការយោគយល់របស់សាធារណជន និងអ្នកធ្វើដំណើរ ទាំងអស់នៅតាមដងផ្លូវបណ្ដោយមាត់ស្ទឹង នឹងចូលរួមអនុវត្តតាមស្មារតីជូនដំណឹងខាងលើ ដើម្បីបញ្ចៀស គ្រោះថ្នាក់កើតមានជាយថាហេតុ ព្រមទាំងការពារបាននូវហេដ្ឋារចនាសម្ព័ន្ធផ្លូវថ្នល់របស់យើងទាំងអស់គ្នា កុំឱ្យខូចខាតបន្ថែមទៀត៕
ប្រភព÷ទូរទស្សន៍ជាតិខេត្តពោធិ៍សាត់/ដោយ÷ធឿន/ដើមអម្ពិល
