បរទេស៖ កាសែត New York Times បានរាយការណ៍កាលពីថ្ងៃសុក្រដោយដកស្រង់មនុស្សជាច្រើនដែលដឹងពីបញ្ហានេះថា ប្រធានាធិបតីអាមេរិកលោក Donald Trump បាននិយាយតាមទូរស័ព្ទកាលពីចុងសប្តាហ៍មុនជាមួយសមភាគីវេណេស៊ុយអេឡាលោក Nicolas Maduro ដោយពិភាក្សាអំពីកិច្ចប្រជុំដែលអាចកើតមានចំពេលមានភាពតានតឹងកាន់តែខ្លាំងឡើង ។
យោងតាមសារព័ត៌មាន RT ចេញផ្សាយនៅថ្ងៃទី២៩ ខែវិច្ឆិកា ឆ្នាំ២០២៥ បានឱ្យដឹងថា លោក Trump បានចោទលោក Maduro ថា បានដឹកនាំក្រុម Cartel de los Soles ដែលសហរដ្ឋអាមេរិកបានកំណត់ថា ជាក្រុមភេរវករកាលពីថ្ងៃចន្ទ ហើយបានគំរាមវាយប្រហារប្រឆាំងនឹង “ពួកភេរវករ” នៅលើទឹកដីវេណេស៊ុយអេឡាថែមទៀត។ ចំណែកក្រសួងការបរទេសវ៉េណេស៊ុយអេឡាវិញ បានច្រានចោលការចោទប្រកាន់នេះ ហើយថាជា “ការកុហកគួរឱ្យអស់សំណើច” ខណៈពេលដែលលោក Maduro បានព្រមានសហរដ្ឋអាមេរិកប្រឆាំងនឹង “សង្រ្គាមបែបឆ្កួតលីលា” ។
យោងតាមកាសែត Times ទោះបីជាមិនមានផែនការសម្រាប់កិច្ចប្រជុំរវាង Trump-Maduro នៅពេលនេះក៏ដោយ ការហៅទូរស័ព្ទសម្ងាត់អាចជាផ្នែកមួយនៃយុទ្ធសាស្ត្ររបស់លោក Trump ក្នុងការបញ្ចូលគ្នានូវការគំរាមកំហែង និងការចរចា។ រដ្ឋមន្រ្តីការទេសអាមេរិក លោក Marco Rubio ដែលត្រូវបានគេស្គាល់ថាសម្រាប់ជំហររឹងរូសរបស់គាត់ចំពោះវេណេហ្ស៊ុយអេឡា និងគុយបា តាមសេចក្តីរាយការណ៍បានចូលរួមនៅក្នុងការសន្ទនានេះ។
ចាប់តាំងពីខែកញ្ញាមក សហរដ្ឋអាមេរិកបានបំផ្លាញនាវារត់ពន្ធគ្រឿងញៀនជាង ២០គ្រឿងនៅក្នុងដែនទឹកអន្តរជាតិនៃសមុទ្រការ៉ាប៊ីន។ ក្នុងសារថ្លែងអំណរគុណដល់កងទ័ព លោក Trump បានប្រាប់ម្តងទៀតថា អាមេរិកអាចវាយប្រហារលើគោលដៅនានាក្នុងប្រទេសវ៉េណេស៊ុយអេឡា។ លោកបានមានប្រសាសន៍ថា “យើងនឹងចាប់ផ្តើមបញ្ឈប់ពួកគេតាមផ្លូវគោកដែរ លើដីងាយស្រួលជាង ប៉ុន្តែវានឹងចាប់ផ្តើមក្នុងពេលឆាប់ៗនេះ”៕
ប្រែសម្រួល ណៃ តុលា
