ប៉ូលិសហុងកុង ចាប់ខ្លួនមនុស្ស៨នាក់ ក្នុងការស៊ើបអង្កេតរឿងពុករលួយ និងការធ្វេសប្រហែស ក្រោយពីអគ្គិភ័យឆេះ Apartment ដែលបណ្តាលឲ្យមនុស្សយ៉ាងហោចណាស់ ១២៨ នាក់បានស្លាប់
បរទេស៖ អគ្គីភ័យដ៏សាហាវបំផុតរបស់ហុងកុងក្នុងរយៈពេលជាច្រើនទស្សវត្សរ៍ ត្រូវបានចោទជាសំណួរអំពីអំពើពុករលួយ និងការធ្វេសប្រហែស ក្នុងការជួសជុលអគារផ្ទះល្វែងដែលបានបណ្តាលឲ្យមនុស្សយ៉ាងហោចណាស់ ១២៨ នាក់បានស្លាប់។
យោងតាមសារព័ត៌មាន AP ចេញផ្សាយនៅថ្ងៃទី២៩ ខែវិច្ឆិកា ឆ្នាំ២០២៥ បានឱ្យដឹងថា អគ្គីភ័យបានឆាបឆេះយ៉ាងសន្ធោសន្ធៅនៅបរិវេណអគារ Wang Fuk Court នៅជាយក្រុងភាគខាងជើងនៃទីក្រុងហុងកុងកាលពីរសៀលថ្ងៃពុធ ដោយអណ្តាតភ្លើងបានគ្របដណ្តប់លើ Apartment ចំនួនប្រាំពីរក្នុងចំណោម Apartment ចំនួនប្រាំបី។ អគារនេះជាលំនៅដ្ឋានរបស់អ្នកស្រុកប្រហែល ៤.៨០០នាក់ ដែលអ្នកខ្លះបានលើកឡើងពីការព្រួយបារម្ភអំពីសុវត្ថិភាពអំពីការជួសជុលច្រើនជាងឆ្នាំ មុនពេលភ្លើងបានឆេះ។
ប៉ូលិសកាលពីថ្ងៃពុធបានចាប់ខ្លួនបុរសបីនាក់មកពីក្រុមហ៊ុនសំណង់មួយដោយសង្ស័យពីបទមនុស្សឃាតនិងការធ្វេសប្រហែសធ្ងន់ធ្ងរ។ ពេលនេះ ពួកគេស្ថិតនៅក្រៅឃុំ។ បន្ទាប់មក អាជ្ញាធរបានចាប់ខ្លួនបុរស ៧ នាក់ និងស្ត្រីម្នាក់ ដែលមានអាយុចាប់ពី ៤០ឆ្នាំ ដល់ ៦៣ ឆ្នាំ រួមទាំងអ្នកម៉ៅការបន្ត នាយកក្រុមហ៊ុនប្រឹក្សាវិស្វកម្ម និងអ្នកគ្រប់គ្រងគម្រោងដែលត្រួតពិនិត្យការជួសជុលនេះ នៅក្នុងការស៊ើបអង្កេតអំពើពុករលួយ។
ប៉ូលីសមិនបានកំណត់អត្តសញ្ញាណក្រុមហ៊ុនដែលជនសង្ស័យធ្វើការនោះទេ ប៉ុន្តែឯកសារដែលបានបង្ហោះនៅលើគេហទំព័ររបស់សមាគមម្ចាស់ផ្ទះបានបង្ហាញថា ក្រុមហ៊ុន Prestige Construction & Engineering គឺជាអ្នកទទួលខុសត្រូវលើការជួសជុល។ ប៉ូលិសបានរឹបអូសយកប្រអប់ឯកសារពីក្រុមហ៊ុនដែលទូរស័ព្ទមិនមានអ្នកឆ្លើយកាលពីថ្ងៃព្រហស្បតិ៍។
មន្ត្រីក៏បាននិយាយដែរថា ពួកគេកំពុងស៊ើបអង្កេតសម្ភារប្រើប្រាស់ទាំងសំណាញ់លើរន្ទា និងបន្ទះស្នោ និងតួនាទីក្នុងការឆាបឆេះនេះ៕
ប្រែសម្រួលៈ ណៃ តុលា
