ប្រធានាធិបតីវេណេស៊ុយអេឡា លោក Nicolas Maduro ជំរុញឱ្យកងកម្លាំងទ័ពអាកាសរក្សាក្នុងការត្រៀមខ្លួន អំឡុងពេលនៃការគំរាមកំហែងរបស់លោក Trump
បរទេស៖ ប្រធានាធិបតីវេណេស៊ុយអេឡា លោក Nicolas Maduro បានជំរុញឱ្យកងកម្លាំងទ័ពអាកាសរបស់ប្រទេសនេះ រក្សាក្នុងការ “ត្រៀមខ្លួនជាស្រេច និងតាំងចិត្ត” ក្នុងការការពារប្រទេស បន្ទាប់ពីប្រធានាធិបតីអាមេរិក Donald Trump បានគំរាមកំហែងប្រតិបត្តិការលើដីនៅក្នុងតំបន់។
យោងតាមសារព័ត៌មាន RT ចេញផ្សាយនៅថ្ងៃទី២៨ ខែវិច្ឆិកា ឆ្នាំ២០២៥ បានឱ្យដឹងថា មន្ទីរបញ្ចកោណបានដាក់ពង្រាយនាវាចម្បាំងទៅកាន់តំបន់ការ៉ាប៊ីន ហើយបានធ្វើការវាយប្រហារលើទូកតូចៗរបស់វេណេហ្ស៊ុយអេឡា ដែលខ្លួននិយាយថា ត្រូវបានប្រើសម្រាប់ការរត់ពន្ធគ្រឿងញៀន ដែលជាសកម្មភាពដែលទីក្រុងវ៉ាស៊ីនតោនចាត់ទុកជាការប្រឆាំងគ្រឿងញៀន ប៉ុន្តែវ៉េណេស៊ុយអេឡា បានហៅថាខុសច្បាប់។
មន្ត្រីអាមេរិកបានចោទលោក Maduro ជាយូរមកហើយថា បានត្រួតពិនិត្យរបបដែលពាក់ព័ន្ធនឹងក្រុមជួញដូរ ហើយបានណែនាំថា សកម្មភាពយោធាដោយផ្ទាល់អាចកើតឡើង។ លោក Nicolas Maduro ដែលនិយាយថា វ៉ាស៊ីនតោនកំពុងព្យាយាមផ្តួលរំលំលោក បានបដិសេធការចោទប្រកាន់ពីការជួញដូរគ្រឿងញៀន ហើយបានព្រមានក្រុងវ៉ាស៊ីនតោនប្រឆាំងនឹងការចាប់ផ្តើម “សង្រ្គាមបែបឆ្កួតលីលា” ។
ថ្លែងកាលពីថ្ងៃព្រហស្បតិ៍ លោក Maduro បាននិយាយថា លោកមានទំនុកចិត្តថា វេណេហ្ស៊ុយអេឡានឹងឈ្នះ ប្រសិនបើវាត្រូវបានបង្ខំឱ្យប្រកាសខ្លួនជា “សាធារណរដ្ឋនៅក្នុងអាវុធ” ដោយបញ្ជាឱ្យសមាជិកនៃអាកាសចរណ៍យោធា Bolivarian រក្សា “ការប្រុងប្រយ័ត្ន និងត្រៀមខ្លួនជាស្រេច”៕
ប្រែសម្រួលៈ ណៃ តុលា
