ប្រកាសផ្ទេរ និងចូលកាន់តំណែង ប្រធានសាលាដំបូង និងព្រះរាជអាជ្ញាសាលាដំបូង ខេត្តកំពង់ចាម
កំពង់ចាម ៖ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នៅព្រឹកថ្ងៃទី ៤ ខែធ្នូ ឆ្នាំ២០២៥ បានអញ្ជើញជាអធិបតី ក្នុងពិធីប្រកាសផ្ទេរ និងចូលកាន់តំណែង ប្រធានសាលាដំបូង និងព្រះរាជអាជ្ញាសាលាដំបូង ខេត្តកំពង់ចាម នៅក្នុងបរិវេណសាលាដំបូងខេត្តកំពង់ចាម។
សូមបញ្ជាក់ថា លោក សួស ឡា ប្រធានសាលាដំបូងខេត្តកំពង់ចាម ត្រូវបានផ្ទេរទៅកាន់ប្រធានសាលាដំបូងខេត្តព្រៃវែង លោក កោ វណ្ឌី ប្រធានសាលាដំបូងខេត្តព្រះសីហនុ មកជំនួស។
លោក វង្ស ប៊ុនវិសុទ្ធ ព្រះរាជអាជ្ញាអមសាលាដំបូងខេត្តកំពង់ចាម ត្រូវបានផ្ទេរទៅកាន់តំណែងជាព្រះរាជអាជ្ញាខេត្តពោធិ៍សាត់ លោក កែវ សុជាតិ ព្រះរាជអាជ្ញាខេត្តបាត់ដំបង មកជំនួស ។
លោក អ៊ុន ចាន់ដា អភិបាលកំពង់ចាមបានថ្លែងអំណរគុណដល់ លោក វង្ស ប៊ុនវិសុទ្ធ និងលោក សួស ឡា ដែលបានបំពេញតួនាទី ភារកិច្ច មានកិច្ចសហប្រតិបត្តិការល្អ ជាមួយគ្រប់ផ្នែកមានសមត្ថកិច្ច និងអាជ្ញាធរមូលដ្ឋាននៅខេត្តកំពង់ចាម លើក្របខណ្ឌកិច្ចការតុលាការ និងយុត្តិ ធម៌សង្គម។ លោកអភិបាលខេត្ត សង្ឃឹមជឿជាក់ថា សាលាដំបូងខេត្តកំពង់ចាម នឹងយកចិត្តទុកដាក់បំពេញការងារតាមសមត្ថកិច្ចជំនាញ និងវិជ្ជាជីវៈ ក្រមសីលធម៌ការងាររបស់ខ្លួនឲ្យទទួលបានជោគជ័យតាមបំណង ប្រាថ្នារបស់ស្ថាប័ន និងបានផ្តល់ និងបានផ្តល់សេវាយុត្តិធម៌ជូនប្រជាពលរដ្ឋ បានល្អប្រសើរជាក់ជាពុំខាន។
នាឱកាសនោះដែរ ឧបនាយករដ្ឋមន្ត្រី កើត រិទ្ធ បានគូសបញ្ជាក់ជូនថ្នាក់ដឹកនាំ និងមន្ត្រីរាជការ នៃសាលាជម្រះក្តីគ្រប់ជាន់ថ្នាក់ និងមន្ត្រីអនុវត្តច្បាប់ពាក់ព័ន្ធទាំងអស់ ឲ្យមានការយកចិត្តទុកដាក់ខ្ពស់ លើការកែទម្រង់ច្បាប់ និងប្រព័ន្ធយុត្តិធម៌ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សំដៅដល់យន្តការដោះស្រាយវិវាទក្រៅប្រព័ន្ធតុលាការ ពន្លឿនការដោះស្រាយសំណុំរឿង និងភាពមិនប្រក្រតីតាមតុលាការ។
ឧបនាយករដ្ឋមន្ត្រី បានផ្ដាំផ្ញើជូនថ្នាក់ដឹកនាំនិងមន្ត្រីរាជការទាំងអស់ ត្រូវពង្រឹងប្រសិទ្ធភាព និងយកចិត្តទុកដាក់ឲ្យបានម៉ឺងម៉ាត់ ក្នុងការអនុវត្តច្បាប់ប្រកបដោយតម្លាភាព សុច្ចរិតភាព ដោយត្រូវប្រកាន់ភ្ជាប់នូវអនាគតិធម៌ទាំង៤ និងសុគតិធម៌ទាំង៥ នៅពេលជំនុំជម្រះក្តី និងអភិក្រមដ៏ថ្លៃថ្លាទាំង៥ ដើម្បីឲ្យការកែទម្រង់វិស័យយុត្តិធម៌ទទួលបានជោគជ័យ៕
ដោយ៖ គីហ្សូណា / ដើមអម្ពិល/ កំពង់ចាម| រូបភាព៖ គីហ្សូណា
