កិច្ចប្រជុំរដ្ឋមន្ត្រីការបរទេសណាតូ នៅចុងឆ្នាំនេះ បង្ហាញពីការបែកបាក់កាន់តែខ្លាំងឡើងរវាងអាមេរិក និងអឺរ៉ុប
បរទេស៖ ខណៈពេលដែលសង្គ្រាមនៅអ៊ុយក្រែន នៅតែបន្តអូសបន្លាយ ហើយការឈ្លោះប្រកែកគ្នានៅតែបន្តលើ «ផែនការសន្តិភាព» ដែលគាំទ្រដោយសហរដ្ឋអាមេរិក រដ្ឋមន្ត្រីការបរទេសនៃអង្គការសន្ធិសញ្ញាអាត្លង់ទិកខាងជើង (NATO) បានជួបប្រជុំគ្នានៅទីក្រុងព្រុចសែល កាលពីថ្ងៃពុធសម្រាប់ការជួបជុំចុងក្រោយរបស់ពួកគេក្នុងឆ្នាំនេះ។
ទោះជាយ៉ាងណាក៏ដោយ ជំនួសឱ្យការបង្ហាញពីការរួបរួម កិច្ចប្រជុំនេះបានទាក់ទាញការត្រួតពិនិត្យយ៉ាងម៉ត់ចត់លើអវត្តមានដ៏កម្ររបស់រដ្ឋមន្ត្រីការបរទេសអាមេរិកជាលើកដំបូងក្នុងរយៈពេលជាងពីរទសវត្សរ៍ ក៏ដូចជាការមិនចុះសម្រុងគ្នាក្នុងចំណោមសម្ព័ន្ធមិត្តអំពីរបៀបបំពាក់អាវុធដល់អ៊ុយក្រែន និងភាពតានតឹងកាន់តែខ្លាំងឡើងលើអ្នកដែលគួរទទួលបានអត្ថប្រយោជន៍ឧស្សាហកម្មនៃការបំពាក់អាវុធឡើងវិញ។
ការអវត្តមានរបស់សហរដ្ឋអាមេរិកបង្កឱ្យមានការសង្ស័យជាធម្មតាទៅហេីយ អង្គការណាតូ រៀបចំកិច្ចប្រជុំរដ្ឋមន្ត្រីការបរទេសជាផ្លូវការពីរដងក្នុងមួយឆ្នាំ។ រដ្ឋមន្ត្រីការបរទេសអាមេរិកលោក Marco Rubio មិនបានចូលរួមកិច្ចប្រជុំនៅថ្ងៃពុធនោះទេ ដោយបានបញ្ជូនអនុរដ្ឋមន្ត្រីការបរទេស Christopher Landau ជំនួសលោក។
នៅក្នុងបទសម្ភាសន៍ជាមួយ Al Arabiya អតីតនាយកគ្រប់គ្រងអាវុធរបស់អង្គការណាតូ លោក William Alberque បានពិពណ៌នាអំពីអវត្តមានរបស់លោក Rubio ថា “ជារឿងមិនធម្មតា”។ លោកបានលេីកឡេីងថា អង្គការណាតូជាធម្មតានឹងកំណត់ពេលវេលាកិច្ចប្រជុំឡើងវិញ ដើម្បីសម្រួលដល់អវត្តមានរបស់សហរដ្ឋអាមេរិក។
មន្ត្រីជាន់ខ្ពស់ម្នាក់របស់ក្រសួងការបរទេសសហរដ្ឋអាមេរិកបានអះអាងថា លោក Rubio បានរៀបចំកិច្ចប្រជុំរាប់សិបលើកជាមួយសមភាគីរបស់លោករួចហើយ ហើយវា “មិនប្រាកដនិយម” ក្នុងការរំពឹងថាលោកនឹងចូលរួមកិច្ចប្រជុំនីមួយៗ។
ការសម្រេចចិត្តរបស់លោក Rubio ក្នុងការបញ្ជូនលោក Landau ជំនួសលោកក៏គួរឱ្យចាប់អារម្មណ៍ផងដែរ ដោយសារមនុស្សជាច្រើននៅក្នុងរង្វង់ការទូតអឺរ៉ុបមើលឃើញថា លោក Landau មានការសង្ស័យចំពោះអង្គការណាតូ។ កាលពីអតីតកាល លោក Landau ក៏បានសួរអំពីភាពពាក់ព័ន្ធរបស់សម្ព័ន្ធមិត្តនៅលើប្រព័ន្ធផ្សព្វផ្សាយសង្គម ដោយហៅវាថា “ដំណោះស្រាយក្នុងការស្វែងរកបញ្ហា”៕
ប្រែសម្រួល ឈូក បូរ៉ា
