គណៈកម្មការអឺរ៉ុប ដាក់ការស៊ើបអង្កេតលេីក្រមហ៊ុន Meta ជុំវិញច្បាប់សម្រាប់ការចូលប្រើ WhatsApp របស់អ្នកផ្តល់សេវា AI
ប្រ៊ុចសែល៖ គណៈកម្មការអឺរ៉ុប បានបើកការស៊ើបអង្កេតប្រឆាំងនឹងការផ្តាច់មុខជាផ្លូវការលើក្រុមហ៊ុន Meta លើគោលនយោបាយថ្មីមួយ ដែលអាចកំណត់ការចូលប្រើ WhatsApp របស់អ្នកផ្តល់សេវាបញ្ញាសិប្បនិម្មិត AI។
ក្រុមហ៊ុន Meta ដំណើរការសេវាកម្មទំនាក់ទំនងតាមអ៊ីនធឺណិត និងបណ្តាញសង្គមជាច្រើន ដូចជា WhatsApp។ បច្ចុប្បន្នអ្នកផ្តល់សេវា AI ផ្តល់ជូនជំនួយការ AI សន្ទនារបស់ពួកគេតាមរយៈកម្មវិធី សម្រាប់កិច្ចការដូចជាការឆ្លើយសំណួរ ការបង្កើតខ្លឹមសារ និងការដោះស្រាយសំណួរសេវាកម្មអតិថិជន។
ទោះបីជាអ្នកផ្តល់សេវា AI នៅតែត្រូវបានអនុញ្ញាតឱ្យប្រើប្រាស់ AI សម្រាប់កិច្ចការជំនួយ ឬជំនួយក៏ដោយ គណៈកម្មការបាននិយាយថា គោលនយោបាយថ្មីរបស់ក្រុមហ៊ុន Meta អាចហាមឃាត់អ្នកផ្តល់សេវា AI ពីការប្រើប្រាស់ឧបករណ៍ ដែលអនុញ្ញាតឱ្យអាជីវកម្ម ដែល AI ជាសេវាកម្មចម្បង ទំនាក់ទំនងជាមួយអតិថិជនតាមរយៈ WhatsApp។
ទោះជាយ៉ាងណាក៏ដោយ សេវាកម្ម “Meta AI” របស់ក្រុមហ៊ុន Meta នៅតែអាចប្រើបាន នេះបើយោងតាមសេចក្តីប្រកាសព័ត៌មានរបស់គណៈកម្មការអឺរ៉ុប។
គណៈកម្មការបានឧ្យដឹងថា សម្រាប់អ្នកផ្តល់សេវា AI ដែលមានវត្តមាននៅលើ WhatsApp រួចហើយ ការអាប់ដេតនេះនឹងអនុវត្តចាប់ពីថ្ងៃទី១៥ ខែមករា ឆ្នាំ២០២៦ ខណៈពេលដែលសម្រាប់អ្នកផ្តល់សេវា AI ដែលទើបតែប្រើប្រាស់ WhatsApp ការអាប់ដេតនេះត្រូវបានអនុវត្តរួចហើយចាប់តាំងពីថ្ងៃទី១៥ ខែតុលា ឆ្នាំ២០២៥។
ការស៊ើបអង្កេតនេះគ្របដណ្តប់លើតំបន់សេដ្ឋកិច្ចអឺរ៉ុបទាំងមូល លើកលែងតែប្រទេសអ៊ីតាលី ជាកន្លែងដែលអាជ្ញាធរប្រកួតប្រជែងជាតិកំពុងពិនិត្យមើលការប្រព្រឹត្តរបស់ក្រុមហ៊ុន Meta និងពិចារណាលើវិធានការបណ្តោះអាសន្នដែលអាចធ្វើទៅបាន៕
ប្រែសម្រួល ឈូក បូរ៉ា
