មូស្គូ ៖ អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានឧ្យដឹងថា សន្ធិសញ្ញាកាត់បន្ថយអាវុធយុទ្ធសាស្ត្រ (New START) រវាងរុស្ស៊ី និងសហរដ្ឋអាមេរិក បម្រើជាមូលដ្ឋាន សម្រាប់ការកសាងទំនុកចិត្តគ្នាទៅវិញទៅមក។
លោក Medvedev បានឧ្យដឹងថា សំណើរបស់រុស្ស៊ីទៅកាន់ភាគីសហរដ្ឋអាមេរិក ដើម្បីបន្តរយៈពេលមួយឆ្នាំ លើការរឹតបន្តឹងដែលកំណត់ដោយសន្ធិសញ្ញា New START នៅតែស្ថិតនៅលើតុពិភាក្សា។ លោកបានបន្ថែមថា “ប្រសិនបើភាគីអាមេរិកចង់បន្ត នោះវាអាចធ្វើទៅបាន”។
ដោយធ្វើអត្ថាធិប្បាយលើការផុតកំណត់ដែលអាចកើតមាននៃសន្ធិសញ្ញា New START នៅថ្ងៃទី៥ ខែកុម្ភៈ លោក Medvedev បានលេីកឡេីងថា ការបញ្ចប់នេះមិនមានន័យថា ជាគ្រោះមហន្តរាយភ្លាមៗ ឬការផ្ទុះឡើងនៃសង្គ្រាមនុយក្លេអ៊ែរនោះទេ ប៉ុន្តែវាគួរតែ “នៅតែធ្វើឱ្យមនុស្សគ្រប់គ្នាភ្ញាក់ផ្អើល”។
សន្ធិសញ្ញា New START ដែលចុះហត្ថលេខាដោយរុស្ស៊ី និងសហរដ្ឋអាមេរិកក្នុងឆ្នាំ២០១០ មានគោលបំណងកំណត់ចំនួនក្បាលគ្រាប់នុយក្លេអ៊ែរ និងយានជំនិះដឹកជញ្ជូនដែលដាក់ពង្រាយ។ សន្ធិសញ្ញានេះបានចូលជាធរមាននៅថ្ងៃទី៥ ខែកុម្ភៈ ឆ្នាំ២០១១ ជាមួយនឹងរយៈពេលសុពលភាពដើម ១០ឆ្នាំ ហើយក្រោយមកត្រូវបានពង្រីកដល់ថ្ងៃទី៥ ខែកុម្ភៈ ឆ្នាំ២០២៥។
ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីខែកញ្ញា ឆ្នាំ២០២៥ ថា រុស្ស៊ីនឹងបន្តគោរពតាមដែនកំណត់ស្នូលនៃសន្ធិសញ្ញារយៈពេលមួយឆ្នាំ បន្ទាប់ពីការផុតកំណត់របស់វា ដោយផ្តល់ថាសហរដ្ឋអាមេរិកចៀសវាងសកម្មភាព ដែលធ្វើឱ្យប៉ះពាល់ដល់តុល្យភាពយុទ្ធសាស្ត្រដែលមានស្រាប់៕
ប្រែសម្រួល ឈូក បូរ៉ា
