លោក ដូណាល់ ត្រាំ ចុះហត្ថលេខាលើបទបញ្ជា សម្រាប់ពន្ធគយសកល ១០ភាគរយ
ញូវយ៉ក៖ យោងតាមការបង្ហោះនៅលើប្រព័ន្ធផ្សព្វផ្សាយ សង្គមនៅថ្ងៃសុក្រ ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិមួយ ដើម្បីដាក់ពន្ធគយ ១០ភាគរយ លើទំនិញនាំចូលពីគ្រប់ប្រទេសទាំងអស់។
ចលនានេះបានកើតឡើងប៉ុន្មានម៉ោងបន្ទាប់ពីតុលាការកំពូល បានសម្រេចក្នុងការបោះឆ្នោត ៦-៣ថា គោលនយោបាយពន្ធគយ របស់លោកក្រោមច្បាប់ អំណាចសេដ្ឋកិច្ចបន្ទាន់អន្តរជាតិ (IEEPA) គឺខុសច្បាប់ ។
លោក ត្រាំ បានសរសេរនៅលើបណ្ដាញ Truth Social របស់លោកថា “វាជាកិត្តិយសដ៏ធំធេងរបស់ខ្ញុំដែលទើបតែចុះហត្ថលេខាពីការិយាល័យ Oval ពន្ធគយសកល ១០ភាគរយលើគ្រប់ប្រទេស ដែលនឹងមានប្រសិទ្ធភាពស្ទើរតែភ្លាមៗ”។
ដោយការចុះហត្ថលេខាលើបទបញ្ជានេះ លោក ត្រាំ កំពុងឆ្លើយតបទៅនឹងសេចក្តីសម្រេច របស់តុលាការកំពូលប្រឆាំង នឹងគោលនយោបាយពន្ធគយរបស់លោក ។
តុលាការបានសម្រេចថា ការបកស្រាយរបស់រដ្ឋបាលលោក ត្រាំ អំពី IEEPA នឹងរំលោភលើសិទ្ធិអំណាចរបស់សភា និងរំលោភលើគោលលទ្ធិ «សំណួរសំខាន់ៗ» ដែលតម្រូវឱ្យសកម្មភាពដែលមាន «សារៈសំខាន់ផ្នែកសេដ្ឋកិច្ច និងនយោបាយយ៉ាងទូលំទូលាយ» ដោយស្ថាប័ននីតិប្រតិបត្តិត្រូវបានអនុញ្ញាតយ៉ាងច្បាស់លាស់ដោយសភា៕
ប្រែសម្រួល ឈូក បូរ៉ា
