កម្មវិធីសប្បុរសធ៌ម «បណ្ណាល័យខ្ញុំ» លើកទី៨ បន្ដផ្ដល់ជូនសៀវភៅ និងសម្ភារៈសម្រាប់សិស្ស សាលាបឋមសិក្សាស្វាយជ័យ
សៀមរាប ៖ លោកសាស្ដ្រាចារ្យបណ្ឌិត ទ្រី ចាន់ធុច អនុរដ្ឋលេខាធិការក្រសួងផែនការ និងជាអនុប្រធានក្រុមប្រឹក្សាភិបាលសាកលវិទ្យាល័យអាស៊ីអឺរ៉ុប នាព្រឹកថ្ងៃទី១០ ខែមីនា ឆ្នាំ២០២៦ បានរៀបចំកម្មវិធីនេះដោយសហការជាមួយសាកលវិទ្យាល័យជាតិកៅស៊ុង នៃវិទ្យាសាស្រ្តនិងបច្ចេកវិទ្យា និងសាកលវិទ្យាល័យភូមិន្ទភ្នំពេញ នាំយកសម្ភារសិក្សា ចំនួន ២០៩កញ្ចប់ ផ្ដល់ជូនសិស្សានុសិស្ស ព្រមទាំងឧបត្ថម្ភថវិកាមួយចំនួន ជូនលោកគ្រូ-អ្នកគ្រូចំនួន១០នាក់ នៅសាលាបឋមសិក្សាស្វាយជ័យ ស្ថិតក្នុងភូមិស្វាយជ័យ ឃុំត្រពាំងធំ ស្រុកប្រាសាទបាគង ខេត្តសៀមរាប។
នេះជាលើកទី៨ ហើយ ដែលកម្មវិធី «បណ្ណាល័យខ្ញុំ» បានជួយឧបត្ថម្ភដល់សិស្សក្នុងតំបន់ដាច់ស្រយាលខ្វះខាត ឲ្យពួកគេមានសម្ភារៈសិក្សាបន្ថែម និងលទ្ធភាពក្នុងការអានសិក្សាស្រាវជ្រាវបង្កើនចំណេះដឹង។ ក្នុងឱកាសនោះ លោកសាស្ដ្រាចារ្យបណ្ឌិត បញ្ជាក់ថា កម្មវិធីសប្បុរសធ៌មនេះ បង្កើតឡើងក្នុងបំណងចូលរួមចំណែកលើកកម្ពស់វិស័យអប់រំ និងដើម្បីលើកទឹកចិត្តសិស្សឱ្យមានចំណង់រៀនសូត្របន្ថែម បណ្ដុះឆន្ទៈ មនសិការស្រលាញ់ការសិក្សា និងស្នេហាជាតិ ក៏ដូចជាការចុះសួរសុខទុក្ខក្នុងដំណើរការអប់រំនៅកម្រិតបឋមសិក្សាផងដែរ។
លោកសាស្ដ្រាចារ្យបណ្ឌិត ទ្រី ចាន់ធុច បានមានប្រសាសន៍ថា ការរីកចម្រើននៃវិស័យអប់រំដូចសព្វថ្ងៃនេះ គឺបានមកពីការយកចិត្តទុកដាក់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ដែលមានចក្ខុវិស័យវែងឆ្ងាយ កែប្រែផ្លាស់ប្ដូរពីសិស្សរត់រកសាលា មកជាសាលារត់រកសិស្ស ដោយបានកសាង និងពង្រាយសាលាជាច្រើនគ្រប់ទីកន្លែង គ្រប់ច្រកល្ហក់ទាំងអស់។ ដោយឡែក សម្រាប់នីតិកាលថ្មី សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានដាក់ចេញនូវយុទ្ធសាស្រ្តបច្ចកោណ ដំណាក់កាលទី១ ដោយផ្ដោតសំខាន់៖ ទី១ ការអភិវឌ្ឍមូលធនមនុស្ស ទី២ ការធ្វើពិពិធកម្មសេដ្ឋកិច្ចនិងការបង្កើនភាពប្រកួតប្រជែង ទី៣ ការអភិវឌ្ឍវិស័យឯកជននិងការងារ ទី៤ ការអភិវឌ្ឍប្រកបដោយភាពធន់ ចីរភាព និងបរិយាបន្ន និងទី៥ ការអភិវឌ្ឍវិស័យសេដ្ឋកិច្ចនិងសង្គមឌីជីថល។
លោកសាស្ដ្រាចារ្យបណ្ឌិត ទ្រី ចាន់ធុច បញ្ជាក់ថា អំណោយនាពេលនេះ គឺបានមកពីការចូលរួមរបស់សាកលវិទ្យាល័យ អាស៊ីអឺរ៉ុប, សាកលវិទ្យាល័យជាតិកៅស៊ុងនៃវិទ្យាសាស្ដ្រ និងបច្ចេកវិទ្យា, សាកលវិទ្យាល័យភូមិន្ទភ្នំពេញ, សមាគមគីវ៉ានីស៍, សមាគមអប់រំអូវ៉ើស៊ីកម្ពុជា និងសប្បុរសជននានារួមគ្នា ជួយដល់វិស័យអប់រំនៅកម្ពុជា តាមរយៈការចែករំលែកពីអ្នកមានលទ្ធភាពជួយដល់អ្នកទន់ខ្សោយខ្វះខាត ដើម្បីចូលរួមជួយដល់មនុស្សក្នុងសង្គមបានរីកចម្រើនទៅព្រមៗគ្នា ក្នុងបំណងរួមចំណែកអភិវឌ្ឍសង្គមជាតិឱ្យបានរីកចម្រើន។
ឯកឧត្ដមសាស្ដ្រាចារ្យបណ្ឌិតក៏បានណែនាំឲ្យសិស្សានុស្សិស្សទាំងអស់ ត្រូវយកចិត្តទុកដាក់ ខិតខំរៀនសូត្រ ពីថ្នាក់បឋម រហូតដល់វិទ្យាល័យ កុំបោះបង់ការសិក្សា ត្រូវព្យាយាមតស៊ូរៀនឲ្យបានចប់ថ្នាក់ឧត្តមសិក្សា ដោយយកការអានជាមូលដ្ឋានគ្រឹះក្នុងការសិក្សា ពីព្រោះអានច្រើនចេះច្រើន! អានច្រើន កើនបញ្ញា!។
ជាមួយគ្នានេះ Prof. Dr. Kao Jui-Chung, ព្រឹទ្ធបុរស National Kaohsiung University of Science and Technology ក៏បានលើកឡើង និងបញ្ជាក់បន្ថែមដល់សប្បុរសជននានាមកពីតៃវ៉ាន់ ដើម្បីស្វែងយល់អំពីស្ថានភាព និងសកម្មភាពសប្បុរសធម៌ របស់កម្មវិធីនេះ និងសកម្មភាពនានាដែលបានធ្វើកន្លងមក។
លោកស្រីនាយិកាបឋមសិក្សាស្វាយជ័យ ក៏បានថ្លែងអំណរគុណដល់ម្ចាស់អំណោយ និងបានចាត់ទុកថា ជំនួយឧបត្ថម្ភនាពេលនេះ ជាការជួយសម្រួលការលំបាកខ្វះខាត ដល់សិស្សានុសិស្សឱ្យកាន់តែស្រលាញ់ការសិក្សារៀនសូត្របន្ថែមទៀត។
គួរបញ្ជាក់ថា សម្រាប់សិស្សានុសិស្ស ២០៩នាក់ ក្នុងម្នាក់ទទួលបានសៀវភៅសរសេរ២ក្បាល, ប៊ិច១ ដើម, ខ្មៅដៃ ២ដើម និងជ័រលុប១។ អ្នកគ្រូ លោកគ្រូ ចំនួន១០នាក់ ក្នុងម្នាក់ៗថវិកា ៤ម៉ឺនរៀន និងជូនថវិកាចំនួន ៤០ម៉ឺនរៀល សម្រាប់ទ្រទ្រង់សាលា។
លើសពីនេះ ក្រុមការងារសប្បុរសធម៌ ក៏បានទស្សនកិច្ចកំសាន្តនៅខេត្តសៀមរាប ជាពិសេសតំបន់ប្រាសាទអង្គរផងដែរ៕
