ប្រធានាធិបតីគុយបាថា លោក «មិនខ្លាច» លោក ដូណាល់ ត្រាំ នោះទេ លោកសុខចិត្តស្លាប់ដើម្បីបដិវត្តន៍ និងត្រៀមខ្លួនដើម្បីប្រយុទ្ធប្រឆាំងនឹងការឈ្លានពានរបស់អាមេរិក
បរទេស៖ ប្រធានាធិបតីគុយបា លោក Miguel Díaz-Canel បាននិយាយថា លោក «មិនខ្លាច» ចំពោះប្រធានាធិបតី ដូណាល់ ត្រាំ និងការគំរាមកំហែងរបស់លោកក្នុងការ «ដណ្តើមយក» ប្រទេសគុយបានោះទេ។
យោងតាមសារព័ត៌មាន POLITICO ចេញផ្សាយនៅថ្ងៃទី១៣ ខែមេសា ឆ្នាំ២០២៦ថា នៅក្នុងបទសម្ភាសន៍ជាមួយ Kristen Welker របស់ NBC ដែលបានចាក់ផ្សាយកាលពីថ្ងៃអាទិត្យ លោក Díaz-Canel បាននិយាយថា ប្រទេសរបស់លោកបានត្រៀមខ្លួនរួចជាស្រេចដើម្បីប្រយុទ្ធប្រឆាំងនឹងការឈ្លានពានរបស់សហរដ្ឋអាមេរិក ហើយថាលោកផ្ទាល់មានឆន្ទៈស្លាប់ដើម្បីបុព្វហេតុនោះ។
លោក Díaz-Canel បាននិយាយនៅក្នុងកម្មវិធី «Meet the Press» តាមរយៈអ្នកបកប្រែថា «ខ្ញុំមិនមានការភ័យខ្លាចទេ។ ខ្ញុំសុខចិត្តលះបង់ជីវិតរបស់ខ្ញុំសម្រាប់បដិវត្តន៍»។
លោកបានសង្កត់ធ្ងន់ថា ប្រទេសគុយបាមិនចង់បានសង្គ្រាមទេ ហើយបានបន្ថែមថា លោកមិនជឿថាប្រជាជនអាមេរិក «ងាយរងគ្រោះ» នឹងគាំទ្រការឈ្លានពានកោះតូចមួយដែលមានចម្ងាយត្រឹមតែ ៩០ ម៉ាយពីឆ្នេរសមុទ្ររដ្ឋផ្លរីដានោះទេ។ ប៉ុន្តែប្រសិនបើមានសង្គ្រាមកើតឡើង លោកបាននិយាយថា នឹងមាន «ការខាតបង់ខ្ពស់ណាស់សម្រាប់អ្នករាល់គ្នាដែលពាក់ព័ន្ធ»។
ដោយសំដៅទៅលើការចាប់ខ្លួនប្រធានាធិបតីវេណេស៊ុយអេឡា លោក Nicolás Maduro ដោយសហរដ្ឋអាមេរិកកាលពីដើមឆ្នាំនេះ លោក Díaz-Canel បានមានប្រសាសន៍ថា «ប្រសិនបើពេលវេលាមកដល់ ខ្ញុំមិនគិតថានឹងមានហេតុផលណាមួយសម្រាប់សហរដ្ឋអាមេរិកក្នុងការចាប់ផ្តើមការឈ្លានពានផ្នែកយោធាប្រឆាំងនឹងប្រទេសគុយបា ឬសម្រាប់សហរដ្ឋអាមេរិកក្នុងការធ្វើការវះកាត់ ឬការចាប់ខ្លួនប្រធានាធិបតីនោះទេ»៕
ប្រែសម្រួលៈ ណៃ តុលា
