គុយបា ថ្កោលទោសទណ្ឌកម្មថ្មីរបស់សហរដ្ឋអាមេរិកថា ជាវិធានការបង្ខិតបង្ខំឯកតោភាគី
ហាវ៉ាណា៖ រដ្ឋាភិបាលគុយបា បានថ្កោលទោសទណ្ឌកម្មថ្មីរបស់សហរដ្ឋអាមេរិកថាជា “វិធានការបង្ខិតបង្ខំឯកតោភាគី” ក្រោយពីអាមេរិកបានប្រកាសដាក់ទណ្ឌកម្មថ្មីលេីប្រទេសនេះ។
រដ្ឋមន្ត្រីការបរទេសគុយបាលោក Bruno Rodriguez បានឧ្យដឹងថា “យើងបដិសេធយ៉ាងដាច់អហង្ការ ចំពោះវិធានការបង្ខិតបង្ខំឯកតោភាគីដែលបានអនុម័តថ្មីៗនេះ” ដោយរដ្ឋាភិបាលសហរដ្ឋអាមេរិក។
លោក Rodriguez បានលេីកឡេីងថា សកម្មភាពទាំងនេះបង្ហាញពីចេតនាដាក់ទណ្ឌកម្មរួមលើប្រជាជនគុយបា នេះបេីយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានកត់សម្គាល់ថា ការប្រកាសនេះស្របគ្នានឹងថ្ងៃទី១ ខែឧសភា នៅពេលដែលប្រជាជនគុយបា រាប់លាននាក់បានចេញមកតាមដងផ្លូវ ដើម្បីថ្កោលទោសការបិទផ្លូវរបស់សហរដ្ឋអាមេរិក និងការឡោមព័ទ្ធផ្នែកថាមពល។
លោក Rodriguez បានបន្ដថា “វិធានការទាំងនេះមានលក្ខណៈក្រៅទឹកដី និងរំលោភលើធម្មនុញ្ញអង្គការសហប្រជាជាតិ” ដោយបន្ថែមថា សហរដ្ឋអាមេរិក មិនមានសិទ្ធិដាក់វិធានការប្រឆាំងនឹងគុយបា ឬប្រឆាំងនឹងប្រទេស ឬភាគីទីបីឡើយ៕
ប្រែសម្រួល ឈូក បូរ៉ា
