បទវិភាគ៖ ការទូតប្រមុខរដ្ឋចង្អុលបង្ហាញទិសដៅ ទំនាក់ទំនងរវាងចិន និងអាមេរិកចាប់ដំណើរថ្មី
“ប្រមុខរដ្ឋនៃប្រទេសចិន និងអាមេរិកកំណត់ជាក់លាក់ពីទម្រង់ថ្មីនៃទំនាក់ទំនងរវាងប្រទេសទាំងពីរ” “កិច្ចសន្ទនារវាងចិននិងអាមេរិកមានសារសំខាន់បំផុតចំពោះស្ថិរភាពរបស់ពិភពលោកទាំងមូល”។ល។ មជ្ឈដ្ឋានមតិអន្តរជាតិផ្តោតការយកចិត្តទុកដាក់ខ្ពស់ចំពោះដំណើរទស្សនកិច្ចរបស់លោកត្រាំ ប្រធានាធិបតីអាមេរិកនៅប្រទេសចិន ចាប់ពីថ្ងៃទី១៣ ដល់ថ្ងៃទី១៥ ខែឧសភា។ ក្នុងអំឡុងពេលដំណើរទស្សនកិច្ច ប្រមុខរដ្ឋចិននិងអាមេរិកបានជួបពិភាក្សាការងារដែលទាក់ទាញចំណាប់អារម្មណ៍របស់ពិភពលោក ការឯកភាពគ្នាបង្កើត”ទំនាក់ទំនងស្ថិរភាពជាយុទ្ធសាស្រ្តរវាងចិននិងអាមេរិកដែលប្រកបដោយលក្ខណៈ ស្ថាបនាគឺជាគំនិតឯកភាពរួមខាងនយោបាយដ៏សំខាន់បំផុត។ ក៏ដូចការវិភាគជាច្រើនដែលបានលើកឡើងថា នេះជាកិច្ចជំនួបជាប្រវត្តិសាស្រ្តមួយលើក។
នេះគឺជាកិច្ចជំនួបទល់មុខគ្នាម្តងទៀតរវាងប្រមុខរដ្ឋចិន និងអាមេរិកបន្ទាប់ពីកិច្ចជំនួបនៅទីក្រុងប៊ូសានកូរ៉េខាងត្បូងកាលពីខែតុលាឆ្នាំមុន ហើយក៏ជាដំណើរទស្សនកិច្ចម្តងទៀតរបស់ប្រធានាធិបតីអាមេរិកនៅប្រទេសចិនបន្ទាប់ពីរំលងអស់រយៈពេលប្រាំបួនឆ្នាំដែរ។ តបតាមការអញ្ជើញរបស់លោកប្រធានាធិបតីត្រាំ លោកXiJinpingប្រធានរដ្ឋចិននឹងបំពេញទស្សនកិច្ចផ្លូវរដ្ឋនៅសហរដ្ឋអាមេរិកនៅរដូវស្លឹកឈើជ្រុះឆ្នាំនេះ។ នេះជាការបង្ហាញឱ្យពិភពលោកឃើញថា ជានិច្ចកាល ការទូតប្រមុខរដ្ឋតែងតែជា”យុថ្កា”សម្រាប់លំនឹងទំនាក់ ទំនងចិននិងអាមេរិក។
ខណៈពេលជួបពិភាក្សាគ្នានៅថ្ងៃទី១៤ខែឧសភា លោកXi Jinping និងលោកត្រាំបានឯកភាពគ្នាចាត់ទុក”ទំនាក់ទំនងស្ថិរភាពជាយុទ្ធសាស្ត្ររវាងចិននិងអាមេរិកដែលប្រកបដោយលក្ខណៈស្ថាបនា”ជាទម្រង់ថ្មីនៃទំនាក់ទំនងទ្វេភាគី ដែលបានទទួលការស្វាគមន៍ពីសំណាក់ប្រជាជននៃប្រទេសទាំងពីរ និង សហគមន៍អន្តរជាតិ ។
តើយើងគួរយល់ដឹងពីអត្ថន័យស្នូលនៃ”ស្ថិរភាពជាយុទ្ធសាស្ត្រប្រកបដោយលក្ខណៈស្ថាបនា”តាមរបៀបណា? លោកXi Jinpingបានបកស្រាយពន្យល់យ៉ាងស៊ីជម្រៅ ដោយសង្កត់ធ្ងន់ថា វាតំណាងឱ្យស្ថិរភាពវិជ្ជមានដែលចាត់ទុកកិច្ចសហប្រតិបត្តិការជាស្នូល ស្ថិរភាពដ៏ល្អប្រសើរដែលមានការប្រកួតប្រជែងកម្រិតសមរម្យ ស្ថិរភាពជាប្រក្រតីដែលអាចគ្រប់គ្រងការខ្វែងគំនិតបាន និងស្ថិរភាពយូរអង្វែងដែលអាចរំពឹងទុកពីសន្តិភាព។ អ្នកវិភាគបានលើកឡើងថា ទម្រង់ទាំងបួនមានភាពប្រទាក់ក្រឡាដែលមានចំណុចរួម នេះមានសារសំខាន់យ៉ាងខ្លាំងសម្រាប់ការជំរុញទំនាក់ទំនងចិន-សហរដ្ឋអាមេរិកឱ្យដើរឆ្ពោះទៅមុខកាន់តែឆ្ងាយ និងកាន់តែរឹងមាំ ។
ទម្រង់ថ្មីនេះមិនត្រឹមតែជាពាក្យស្លោកមួយម៉ាត់នោះទេ ប៉ុន្តែគួរតែជាកិច្ចខិតខំប្រឹងប្រែងដែលដើរស្របតាមទិសដៅតែមួយ។ ក្នុងអំឡុងពេលកិច្ចជំនួបលើកនេះ លោកXi Jinpingបានសង្កត់ធ្ងន់ថា ការគាំពារសន្តិភាព និងស្ថិរភាពនៃច្រកសមុទ្រតៃវ៉ាន់ គឺជាតួចែករួមដ៏ធំបំផុតរបស់ភាគីទាំងពីរចិន និងសហរដ្ឋអាមេរិក ហើយសហរដ្ឋអាមេរិកចាំបាច់ត្រូវដោះស្រាយបញ្ហាតៃវ៉ាន់យ៉ាងមធ្យ័តបំផុត។ ក្នុងកិច្ចជំនួបលើកនេះ ប្រទេសចិនទទួលអារម្មណ៍ថា សហរដ្ឋអាមេរិកយល់ដឹងពីគោលជំហររបស់ចិន យកចិត្តទុកដាក់ដល់ក្តីកង្វល់របស់ចិន ហើយក៏ដូចគ្នានឹងសហគមន៍អន្តរជាតិផងដែរ មិនទទួលស្គាល់ឬទទួលយកមាគ៌ាឆ្ពោះទៅរកឯករាជ្យភាពរបស់តៃវ៉ាន់ឡើយ។
ទន្ទឹមនឹងនេះ កិច្ចសហប្រតិបត្តិការផ្នែកសេដ្ឋកិច្ច និងពាណិជ្ជកម្មគួរតែបន្តក្លាយជា”យុថ្កា”សម្រាប់លំនឹងនិងជំរុញទំនាក់ទំនងចិន-សហរដ្ឋអាមេរិក។ បច្ចុប្បន្ននេះ មានសហគ្រាសវិនិយោគដោយចិនជាង៧ពាន់នៅសហរដ្ឋអាមេរិក និងសហគ្រាសវិនិយោគដោយអាមេរិកប្រហែល៨ម៉ឺននៅប្រទេសចិន។ ក្រុមហ៊ុនអាមេរិកបានរក្សាទំហំតាំងពិព័រណ៍ធំបំផុតនៅឯពិព័រណ៍នាំចូលចិនអន្តរជាតិក្នុងរយៈពេលប្រាំពីរឆ្នាំជាប់ៗគ្នា ។ល។ ទិន្នន័យមួយចំនួនបានបញ្ជាក់ថា ធាតុពិតនៃទំនាក់ទំនងផ្នែកសេដ្ឋកិច្ចនិងពាណិជ្ជកម្មរវាងចិននិងសហរដ្ឋអាមេរិក គឺការផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ។
“សមិទ្ធផលនវានុវត្តន៍របស់ចិនគឺច្រើនណាស់” “ទីផ្សារចិនមានភាពរឹងមាំខ្លាំងណាស់” “អនាគតអភិវឌ្ឍន៍សេដ្ឋកិច្ចរបស់ចិនគឺល្អណាស់” ។ល។ លោក Jensen Huang នាយកប្រតិបត្តិក្រុមហ៊ុន Nvidia លោក Tim Cook នាយកប្រតិបត្តិក្រុមហ៊ុនAppleនិងសហគ្រឹនអាមេរិកដទៃទៀតដែលអមដំណើរទស្សនកិច្ចរបស់លោកត្រាំនៅប្រទេសចិនបានបង្ហាញឥរិយាបថជាវិជ្ជមានព្រមៗគ្នា។
ឆ្នាំនេះគឺជាការចាប់ផ្តើមនៃការអនុវត្តផែនការអភិវឌ្ឍន៍ជាតិ៥ឆ្នាំទី១៥របស់ប្រទេសចិន និងជាខួបលើកទី២៥០នៃឯករាជ្យភាពរបស់អាមេរិក។ យើងទន្ទឹងរង់ចាំភាគីទាំងពីរអនុវត្តឱ្យបានល្អនូវគំនិតឯកភាពរួមដ៏សំខាន់របស់ប្រមុខរដ្ឋនៃប្រទេសទាំងពីរ ហើយជំរុញឱ្យឆ្នាំ២០២៦ក្លាយជាឆ្នាំជាប្រវត្តិសាស្ត្រនិងជាឆ្នាំនៃនិមិត្តសញ្ញាស្តីពីការបន្តវេនបុព្វហេតុជំនាន់មុននិងត្រួសត្រាយផ្លូវអភិវឌ្ឍន៍ថ្មីនៅពេលអនាគតសម្រាប់ទំនាក់ទំនងចិន-អាមេរិក។ ពេលវេលានឹងបញ្ជាក់ថា ការសម្រេចបាននូវការស្តារភាពរុងរឿងដ៏មហិមារបស់ប្រជាជាតិចិនឡើងវិញនិងការធ្វើឱ្យអាមេរិកមានភាពអស្ចារ្យឡើងវិញ អាចដើរស្របតាមទិសដៅជាមួយគ្នាបាន ភាគីយើងទាំងពីរអាចជួយសម្រេចគោលដៅគ្នាទៅវិញទៅមក ដើម្បីផ្តល់ផលប្រយោជន៍ដល់ពិភពលោក៕
