រុស្ស៊ី បាញ់មីស៊ីលផ្លោង ទៅលើទីក្រុងគៀវ របស់អ៊ុយក្រែន បណ្តាលឱ្យមនុស្ស៣នាក់ស្លាប់ និង២០នាក់ទៀតរបួស
បរទេស៖ មីស៊ីលផ្លោងរបស់រុស្ស៊ីបានសម្លាប់មនុស្សយ៉ាងហោចណាស់បីនាក់ និងរបួសមនុស្ស ២០ នាក់ទៀតនៅទីក្រុងគៀវនៅព្រឹកថ្ងៃព្រហស្បតិ៍ នេះបើយោងតាមអភិបាលក្រុង លោក Vitali Klitschko បាននិយាយនៅលើកម្មវិធីផ្ញើសារ Telegram ដោយបានអះអាងថា មីស៊ីលបានបំផ្លាញអគារ និងធ្វើឱ្យផ្នែកខ្លះនៃរដ្ឋធានីអ៊ុយក្រែនគ្មានអគ្គិសនី។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២០ ខែសីហា ឆ្នាំ២០២៦ថា លោក Klitschko បាននិយាយថា អគ្គីភ័យបានផ្ទុះឡើងបន្ទាប់ពីរុស្ស៊ីបានវាយប្រហារជាន់ខាងលើនៃអគារលំនៅដ្ឋានកម្ពស់៩ជាន់ ហើយមនុស្សត្រូវបានជាប់នៅកន្លែងមួយផ្សេងទៀត ខណៈដែលទីក្រុងមូស្គូក៏បានវាយប្រហារអគារមិនមែនលំនៅដ្ឋាន និងអាផាតមិន ឃ្លាំង និងមន្ទីរពេទ្យកុមារ។
សាក្សីម្នាក់របស់រ៉យទ័របានរាយការណ៍ថា បានឮសំឡេងផ្ទុះជាច្រើនដង។ នៅក្នុងតំបន់ជុំវិញរដ្ឋធានីអ៊ុយក្រែន មនុស្សម្នាក់ទៀតត្រូវបានសម្លាប់ នេះបើយោងតាមមន្ត្រីមូលដ្ឋានម្នាក់បាននិយាយដាច់ដោយឡែកនៅលើ Telegram។
រុស្ស៊ី និងអ៊ុយក្រែនបានផ្លាស់ប្តូរការវាយប្រហារជារៀងរាល់ថ្ងៃ បន្ទាប់ពីការឈ្លានពានទ្រង់ទ្រាយធំរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ ២០២២ ហើយកិច្ចខិតខំប្រឹងប្រែងផ្នែកការទូតដែលពាក់ព័ន្ធនឹងសហរដ្ឋអាមេរិក និងអឺរ៉ុបរហូតមកដល់ពេលនេះបានបរាជ័យក្នុងការនាំមកនូវបទឈប់បាញ់យូរអង្វែង។
អ៊ុយក្រែនបានប្រគល់សំណើទៅអ្នកចរចាអាមេរិកគឺលោក Steve Witkoff និងលោក Jared Kushner សម្រាប់ផែនការបញ្ចប់សង្គ្រាម នេះបើយោងតាមការលើកឡើងរបស់លោកប្រធានាធិបតី Volodymyr Zelenskiy ក្នុងខែនេះ។ លោក Witkoff និងលោក Kushner បានទៅទីក្រុងមូស្គូជាលើកចុងក្រោយកាលពីខែមករាឆ្នាំមុន ហើយមិនទាន់បានធ្វើដំណើរទៅទីក្រុងគៀវនៅឡើយទេ៕
ប្រែសម្រួលៈ ណៃ តុលា
