Covid-19

ប្រធានាធិបតីរុស្ស៊ី លោក ពូទីន ពាក់ឈុតការពារមេរោគ hazmat អំឡុងពេលចុះសួរសុខទុក្ខអ្នកជំងឺ COVID-19 នៅមន្ទីរពេទ្យ

បរទេស៖ ចំនួនករណីឆ្លងជំងឺ COVID-19 នៅលើពិភពលោកបាន កើនឡើងដល់ ៣៥០.០០០ នាក់ និងមានអ្នកស្លាប់ច្រើនជាង ១៧.០០០ នាក់។ ប្រទេសរុស្ស៊ី បានចុះបញ្ជីចំនួន ៤៩៥ ករណីនៃការឆ្លងវីរុសនេះ រួមទាំង ៥៧ ករណីថ្មីនៅក្នុងតំបន់ចំនួន ១៤ ក្នុងរយៈពេល ២៤ ម៉ោង។ អ្នកជំងឺដែលឆ្លងវីរុស COVID-19 នៅប្រទេសរុស្ស៊ីត្រូវបាន បញ្ជូនទៅមន្ទីរពេទ្យនៅភាគនិរតីទីក្រុងមូស្គូ។

យោងតាមសារព័ត៌មាន Sputnik ចេញផ្សាយនៅថ្ងៃទី២៥ ខែមីនា ឆ្នាំ២០២០ បានឱ្យដឹងថា ប្រធានាធិបតីរុស្ស៊ីលោកវ្លាឌីមៀពូទីន បានទៅដល់មន្ទីរពេទ្យមួយនៅតំបន់ Kommunarka ដែលជាសង្កាត់មួយ នៅភាគនិរតីទីក្រុងម៉ូស្គូជាកន្លែង ដែលអ្នកជំងឺកំពុងទទួលការព្យាបាលជំងឺ COVID-19 ។ វីដេអូមួយបានលេចចេញតាម អ៊ីនធឺណេតដែលប្រធានាធិបតីរុស្ស៊ីត្រូវបានគេមើលឃើញថា ស្លៀកឈុតការពារមេរោគ hazmat ពណ៌លឿង និងឧបករណ៍ដកដង្ហើម ដែលព័ទ្ធជុំវិញដោយបុគ្គលិកមន្ទីរពេទ្យ។

អ្នកនាំពាក្យវិមានក្រឹមឡាំងលោក Dmitry Peskov ធ្លាប់បាននិយាយថា ឧបនាយករដ្ឋមន្ត្រីលោក Tatyana Golikova អភិបាលក្រុងម៉ូស្គូលោក Sergei Sobyanin និងរដ្ឋមន្រ្តីក្រសួងសុខាភិបាលលោក Mikhail Murashko បានជួបប្រជុំជាមួយប្រធានាធិបតីពូទីន ជាកន្លែងដែលលោកបានជូនដំណឹងដល់ពួកគេថា លោកនឹងទៅទីក្រុង Kommunarka ដើម្បីពិនិត្យមើលស្ថានភាពការងារនៅឯមន្ទីរពេទ្យ។

ប្រធានាធិបតីរុស្ស៊ីមុននេះបានបញ្ជាក់ថា លោកគ្រោងនឹងពិភាក្សាពីវិធានការ វេជ្ជសាស្រ្តពិសេស ដើម្បីទប់ស្កាត់ការឆ្លងវីរុស ជាមួយគណៈរដ្ឋមន្រ្តី៕

To Top