បរទេស៖ ក្រុមប្រឹក្សាប្រឹក្សាធុរកិច្ច បាននិយាយកាលពីថ្ងៃច័ន្ទថា ការបាត់បង់ការងាររបស់ប្រទេសថៃ អាចឈានដល់ ១០ លាន កន្លែង ប្រសិនបើការផ្ទុះឡើងនៃវីរុសកូរ៉ូណា នៅតែអូសបន្លាយ មានរយៈពេលពីរបីខែទៀត។
យោងតាមសារព័ត៌មាន Bangkok Post ចេញផ្សាយនៅថ្ងៃទី១៣ ខែមេសា ឆ្នាំ២០២០ បានឱ្យដឹងថា សេដ្ឋកិច្ចរបស់ប្រទេសថៃ កំពុងរងការវាយប្រហារយ៉ាងខ្លាំង ដោយសារការផ្ទុះឡើងនៃវីរុស ហើយកំពុងឈាន ទៅរកវិបត្តិសេដ្ឋកិច្ច។
សមាជិកក្រុមប្រឹក្សា និងជាប្រធានសភាពាណិជ្ជកម្មថៃ លោក កាលីន សារ៉ាស៊ីន បាននិយាយថា យើងគិតថាការងារប្រហែល ៧ លាន ត្រូវបានបាត់បង់រួចហើយ ហើយតួលេខនេះ នឹងកើនឡើងដល់ ១០ លានកន្លែង ប្រសិនបើការផ្ទុះឡើង អូសបន្លាយក្នុងរយៈពេល ២-៣ ខែ ទៅមុខទៀត ។ ប្រទេសនេះមានកម្លាំងពលកម្ម ប្រហែល ៣៨ លាននាក់។
លោក Thosaporn Sirisumphand ប្រធានក្រុមប្រឹក្សា បាននិយាយថា ក្រុមប្រឹក្សារដ្ឋាភិបាល និងទីភ្នាក់ងារអាជីវកម្ម បានពិភាក្សាអំពីសំណើ សម្រាប់វិធានការគាំទ្រ មុនពេលស្នើសុំពួកគេ ទៅរដ្ឋាភិបាល។ លោកបន្តថាក្នុងនោះរួមមាន ប្រាក់កម្ចីគ្មានការប្រាក់ ការកាត់ពន្ធ និងជំនួយហិរញ្ញវត្ថុ ដើម្បីរក្សាការងារ។
ធនាគារកណ្តាល បានព្យាករណ៍ថា សេដ្ឋកិច្ចនឹងធ្លាក់ចុះ ៥,៣% នៅឆ្នាំនេះ ដែលជាដំណើរការខ្សោយបំផុត ចាប់តាំងពីវិបត្តិហិរញ្ញវត្ថុអាស៊ីឆ្នាំ ១៩៩៨ ៕
ប្រទេសថៃដែលបានកត់ត្រា ករណីឆ្លងចំនួន ២.៥៧៩ ករណីនិងមនុស្សស្លាប់ ៤០ នាក់ និងបានដាក់បម្រាមគោចរពេលយប់ នៅទូទាំងប្រទេស ដោយបានបិទផ្សារ និងបានរារាំងសកម្មភាពនានា ដើម្បីកំណត់ការរាលដាល៕ ប្រែសម្រួលៈ ណៃ តុលា
