Covid-19

អ្នកស្លាប់ ដោយសារមេរោគកូវីដ១៩ នៅថៃ កើនដល់ ៥០នាក់ និងឆ្លងជាង ២.៨០០នាក់

បរទេស៖ នៅថ្ងៃព្រហស្បតិ៍ រដ្ឋាភិបាលថៃ បានរាយការណ៍ថា មានអ្នកឆ្លងវីរុសថ្មីកូវីដ១៩ ចំនួន ១៣ នាក់ទៀត ដែលនាំឱ្យអ្នកឆ្លងសរុប កើនឡើងដល់ ២.៨៣៩ នាក់ និងស្លាប់ម្នាក់ទៀត សរុបចំនួនអ្នកស្លាប់កើនដល់ ៥០ នាក់។

យោងតាមសារព័ត៌មានថៃ បាងកកប៉ុស្តិ៍ ចេញផ្សាយនៅថ្ងៃទី២៣ ខែមេសា ឆ្នាំ២០២០ បានឱ្យដឹងថា ការបូកសរុបករណីថ្មី គឺទាបជាងចំនួន ១៥ ករណីកាលពីថ្ងៃពុធ។ វាជាកម្រិតទាបបំផុត ចាប់តាំងពីថ្ងៃទី ១៤ ខែមីនា ហើយជាថ្ងៃទី ៥ នៃការធ្លាក់ចុះជាបន្តបន្ទាប់។ ទោះយ៉ាងណា ដោយសារតែការធ្វើតេស្តមានកំណត់ ចំនួនពិតប្រាកដ នៃការឆ្លងត្រូវបានគេជឿជាក់ថា ខ្ពស់ជាងនេះ។

លោកវេជ្ជបណ្ឌិត Taweesilp Visanuyothin អ្នកនាំពាក្យមជ្ឈមណ្ឌល គ្រប់គ្រងស្ថានភាព Covid-19 របស់រដ្ឋាភិបាលថៃ បាននិយាយថា ស្ត្រីដែលស្លាប់ អាយុ ៧៨ ឆ្នាំ ដំបូងបានទៅមន្ទីរពេទ្យ នៅទីក្រុងបាងកក ដោយមានជំងឺទឹកនោម នៅថ្ងៃទី ២១ ខែមីនា។

នៅថ្ងៃទី ២៤ ខែមីនា ស្រ្តីខាងលើបានកើតជំងឺគ្រុន និងរលាកសួត ហើយក្រោយមក បានធ្វើតេស្តវិជ្ជមានចំពោះ Covid-19 ៕ ប្រែសម្រួលៈ ណៃ តុលា

To Top
×