បរទេស៖ អាជ្ញាធរទីក្រុងបាននិយាយថា ទីក្រុងហូជីមិញ នឹងបន្តបង្កើនការចាក់វ៉ាក់សាំងពី ២៥០ ០០០ ដូស ទៅ ៣០០ ០០០ ដូសក្នុងមួយថ្ងៃ ដើម្បីចាក់ឱ្យប្រជាជនយ៉ាងតិច១ដូស ទៅ ១០០ ភាគរយនៃប្រជាជនរបស់ខ្លួន ដែលមានអាយុចាប់ពី ១៨ ឆ្នាំឡើងទៅនៅចុងខែនេះ។
យោងតាមសារព័ត៌មាន Vietnam News ចេញផ្សាយនៅថ្ងៃទី១០ ខែសីហា ឆ្នាំ២០២១ បានឱ្យដឹងថា បច្ចុប្បន្នវៀតណាមកំពុងចាក់វ៉ាក់សាំងជូនប្រជាជនប្រហែល ២២០ ០០០ ទៅ ២៥០ ០០០ ដូស ក្នុងមួយថ្ងៃ។
ថ្លែងនៅក្នុងសន្និសីទសារព័ត៌មានមួយនៅថ្ងៃអង្គារទី ១០ ខែសីហា អនុប្រធានមន្ទីរសុខាភិបាលទីក្រុង គឺលោក Nguyễn Hoài Nam បាននិយាយថា ជាមួយនឹងការចាក់វ៉ាក់សាំងចំនួន ២៥០ ០០០-៣០០ ០០០ ដូស ដែលត្រូវបានចាក់ក្នុងមួយថ្ងៃ គឺទីក្រុងនឹងប្រើថ្នាំដែលនៅសល់ ៩១៣ ២០៤ ដូសត្រឹមថ្ងៃទី ១២ ខែសីហា។ រួមទាំងចំនួន ៥៩១ ៩០០ ដូសដែលបានផ្តល់ដោយក្រសួងសុខាភិបាលនៅថ្ងៃច័ន្ទ (៩ សីហា) ។
គណៈកម្មាធិការប្រជាជនទីក្រុងបានស្នើឱ្យក្រសួងសុខាភិបាលបែងចែកវ៉ាក់សាំង ចំនួន ៥,៥ លានដូសបន្ថែម ដើម្បីបំពេញតាមគោលដៅរបស់ប្រជាជនទាំងអស់ដែលមានអាយុចាប់ពី ១៨ ឆ្នាំឡើងទៅ ឬ ៧ លាននាក់ដែលត្រូវចាក់វ៉ាក់សាំងនៅចុងខែនេះ។
ទីក្រុងបានទទួលវ៉ាក់សាំងជាង ៤,១ លានដូសនៅចន្លោះថ្ងៃទី ៨ ខែមីនាដល់ថ្ងៃទី ៩ ខែសីហាហើយបានចាក់ច្រើនជាង ៣,៤ លានដូស។ នេះបើយោងតាមរបាយការណ៍ដែលចេញដោយនាយកដ្ឋានសុខភាពទីក្រុងកាលពីថ្ងៃច័ន្ទ៕
ប្រែសម្រួលៈ ណៃ តុលា
