បរទេស៖ អាជ្ញាធរទេសចរណ៍របស់កោះភូកេត ប្រទេសកំពុងរៀបចំវិធានការដើម្បីស្វាគមន៍ការកើនឡើងនៃការមកដល់នៃភ្ញៀវទេសចរពីប្រទេសចិន និងភ្ញៀវទេសចរមកពីប្រទេសកាហ្សាក់ស្ថាន នៅពេលដែលគោលនយោបាយលើកលែងទិដ្ឋាការថ្មីដែលត្រូវអនុវត្តនៅសប្តាហ៍ក្រោយ។
យោងតាមសារព័ត៌មានថៃ បាងកក ប៉ុស្តិ៍ ចេញផ្សាយនៅថ្ងៃទី២១ ខែកញ្ញា ឆ្នាំ២០២៣ បានឱ្យដឹងថា ដោយបានប្រកាសនៅក្នុងកាសែត Royal Gazette កាលពីថ្ងៃអង្គារ ការចូលកាន់តែងាយស្រួល និងការស្នាក់នៅដោយគ្មានទិដ្ឋាការរយៈពេល ៣០ថ្ងៃសម្រាប់ភ្ញៀវទេសចរសញ្ជាតិមកពីប្រទេសទាំងពីរ នឹងមានប្រសិទ្ធភាពចាប់ពីថ្ងៃច័ន្ទ និងចុងក្រោយរហូតដល់ថ្ងៃទី២៩ ខែកុម្ភៈ។
ដើម្បីស្វាគមន៍ភ្ញៀវទេសចរណ៍ឈុតទីមួយនៃភ្ញៀវទេសចរពីប្រទេសចិន និងភ្ញៀវទេសចរមកពីប្រទេសកាហ្សាក់ស្ថាន អភិបាលរងនៃអាជ្ញាធរទេសចរណ៍ថៃ (TAT) និងតំណាងការិយាល័យ TAT នៅកោះភូកេត នឹងចូលរួមពិធីស្វាគមន៍ដែលរៀបចំសម្រាប់ការហោះហើរលើកដំបូង ដោយគ្មានទិដ្ឋាការចុះចតនៅកោះរមណីយដ្ឋាននេះ។ នេះបើតាមលោក ខុងសាក់ ខូពុងសាខន ប្រធានសភាពាណិជ្ជកម្មកោះភូកេត។
នៅពេលសួរអំពីអត្ថប្រយោជន៍ទេសចរណ៍លើកោះអាច រំពឹងពីគម្រោងលើកលែងទិដ្ឋាការរយៈពេលប្រាំខែនេះ លោក ខុងសាក់ បាននិយាយថា កោះនេះអាចមើលឃើញរលកនៃភ្ញៀវទេសចរ មកពីប្រទេសទាំងពីរនេះ ជាពិសេសភ្ញៀវពីប្រទេសចិន ដោយសារតែលក្ខខណ្ឌបន្ធូរបន្ថយសម្រាប់អ្នកដែលចង់ធ្វើដំណើរលើកោះ ដែលអាចនាំឱ្យការធ្វើផែនការធ្វើដំណើរកាន់តែងាយស្រួល។
យោងតាមលោក ខុងសាក់ គឺភ្ញៀវទេសចរចិនកាន់តែច្រើនត្រូវបានគេរំពឹងថា នឹងជួយឱ្យឧស្សាហកម្មនេះងើបឡើងវិញដោយសារតែចំនួនរបស់ភ្ញៀវទេសចរបានស្ទុះងើបឡើងវិញដល់ ៣០ភាគរយនៃកម្រិត មុនពេលមានជំងឺកូវិដ១៩។
លោក ខុងសាក់ បានរំពឹងថា ចំនួននេះនឹងកាន់តែប្រសើរឡើងជាមួយ នឹងអត្រាការកក់សណ្ឋាគារដែលប្រសើរឡើងដែលបានកើនឡើងក្នុងសប្តាហ៍ដំបូងនៃខែនេះ ខណៈដែលទេសចរណ៍ផ្លាស់ប្តូរទៅកាន់រដូវកាលសំបូរភ្ញៀវដោយសារតែពិធីបុណ្យហូបបន្លែរបស់កោះនេះ។
ប្រធានសមាគមទេសចរណ៍ភូកេត លោក ថានេត តាន់ធីពីរ៉ា យ៉ាគី ក៏បានរំពឹងថា អត្រានៃការងើបឡើងវិញរបស់ភ្ញៀវទេសចរនឹងកើនឡើងទ្វេដង។ លោកបានបន្តថា តម្លៃសំបុត្រឡើងខ្ពស់បន្ទាប់ពីគម្រោងលើកលែងទិដ្ឋាការនេះត្រូវបានប្រកាសអាចនាំឱ្យកោះនេះរំពឹងថា នឹងមានភ្ញៀវទេសចរចិនដែលមានគុណភាពល្អប្រសើរជាងមុន។
ទោះជាយ៉ាងណាក៏ដោយ កិច្ចសហប្រតិបត្តិការបន្ថែមទៀតរវាងរដ្ឋាភិបាលចិន និងថៃត្រូវបានរំពឹងទុក ជាពិសេសផែនការ give-to-go ដើម្បីបង្កើនទេសចរណ៍នៅលើកោះនេះ៕
ប្រែសម្រួលៈ ណៃ តុលា
