អាមេរិក៖ យោងតាមរបាយការណ៍ថ្មី បានឲ្យដឹងថា ក្រុមហ៊ុន Apple មានការរំពឹងទុកយ៉ាងខ្លាំង ចំពោះទូរស័ព្ទ iPhone 5G ដែលមានព័ត៌មាន ចចាមអារ៉ាមជាច្រើនរបស់ខ្លួន នឹងត្រូវចេញផ្សាយទូទំាងពិភពលោក នឹងចេញលក់ជាផ្លូវការ នាឆ្នាំ២០២០ខាងមុខនេះ នេះបើយោងតាមការចេញផ្សាយ ពីគេហទំព័រឌៀលីម៉ែល។
របាយការណ៍ថ្មីមួយ ពីសារព័ត៌មាន Nikkei Asian Review បាននិយាយថា ក្រុមហ៊ុនបច្ចេកវិទ្យាយក្សមួយនេះ គ្រោងនឹងដឹកជញ្ជូនប្រមាណ ៨០ លានគ្រឿង សម្រាប់ទូរស័ព្ទ iPhone 5G ។ ទូរស័ព្ទនេះត្រូវបានគេរំពឹងថា នឹងចេញជា៣ម៉ូដែល ហើយនឹងបំពាក់ប្រព័ន្ធដំណើរការថ្មី ដែលរចនាដោយក្រុមហ៊ុន Qualcomm ។
ប្រព័ន្ធ 5G នៅតែជាស្តង់ដារ កំពុងលេចចេញមក Apple នឹងមិនមែនជាក្រុមហ៊ុន ផលិតស្មាតហ្វូនដំបូងបង្អស់ ដែលបើកដំណើរការទូរស័ព្ទ 5G នោះទេ។កាលពីខែមេសា Samsung បានបញ្ចេញនូវស្មាតហ្វូនស៊េរី 5G ហើយនាបច្ចុប្បន្នរួមមាន Galaxy S10 5G, Galaxy Fold 5G, Galaxy Note10 5G និង Galaxy A90 5G ។
ទូរស័ព្ទមានតម្លៃថ្លៃ ជាងស្មាតហ្វូនធម្មតា ដោយម៉ូដែល 5G របស់ Samsung មានតម្លៃចាប់ពី ៨៥០ ដុល្លារដល់ ២០០០ ដុល្លារ។ កាលពីខែកញ្ញាក្រុមហ៊ុន Samsung បាននិយាយថា ខ្លួនបានលក់ទូរស័ព្ទ 5G ចំនួន ២ លានគ្រឿងនៅទូទាំងជួររបស់ខ្លួន ហើយបានព្យាករណ៍ថា ខ្លួននឹងលក់បានចំនួនសរុប ៤ លានគ្រឿងនៅចុងឆ្នាំនេះ។
បញ្ហាប្រឈមមួយ ក្នុងការអភិវឌ្ឍទីផ្សារ 5G គឺក្រុមហ៊ុនទូរស័ព្ទចល័តមានតម្លៃខ្ពស់ ត្រូវចំណាយដើម្បីសាងសង់ ហេដ្ឋារចនាសម្ព័ន្ធដើម្បីគាំទ្រវា៕ ដោយ៖លី ភីលីព
