បរទេស៖ ប្រទេសជប៉ុន បានដាក់នាវា ទេសចរណ៍ Diamond Princes ដែលមានផ្ទុកអ្នកដំណើរ ៣៧០០ នាក់ ឱ្យនៅដាច់ដោយឡែកពីគេ នៅលើកោះយូកូហាម៉ា។ យោងតាមទិន្នន័យ ចុងក្រោយ មានមនុស្សរហូតដល់ ៣៥៥នាក់ បានឆ្លងមេរោគ រលាកសួត បង្កឡើងដោយ វីរុសកូរ៉ូណា ឬ Covid-19 នៅលើនាវា ដូច្នេះមានប្រទេសជាច្រើន កំពុងព្យាយាមជម្លៀស ជនជាតិរបស់ពួកគេ ចេញពីនាវាទេសចរណ៍នេះ ។
យោងតាមសារព័ត៌មាន Sputnik ចេញផ្សាយនៅថ្ងៃទី១៧ ខែកុម្ភៈ ឆ្នាំ២០២០ បានឱ្យដឹងថា អាជ្ញាធរជប៉ុន បានលុបចោល ពិធីអបអរសាទរ ជាសាធារណៈសម្រាប់ ថ្ងៃកំណើត របស់ព្រះចៅអធិរាជ ណារុ ហ៊ីតូ ដោយសារតែ ការរីករាលដាលនៃវីរុសឆ្លងនេះ។
ទីភ្នាក់ងារ គ្រួសារអធិរាជ បាននិយាយថា «ដោយមើលឃើញ ពីស្ថានភាពផ្សេងៗ យើងបានសំរេចចិត្ត លុបចោលដំណើរទស្សនកិច្ច របស់ប្រជាជនទូទៅ ទៅកាន់ព្រះបរមរាជវាំង សម្រាប់ថ្ងៃកំណើត របស់ព្រះចៅអធិរាជ ។ ការបង្ហាញខ្លួន របស់ព្រះចៅអធិរាជ នៅពេលព្រឹកក៏ដូចជា ការចុះហត្ថលេខា ជាសាធារណៈ នៃសៀវភៅស្វាគមន៍ ក៏នឹងត្រូវលុបចោល ដូចគ្នាដែរ» ។
សូមជម្រាបថា អធិរាជ ណារុហ៊ីតូ បានឡើងសោយរាជ្យ កាលពីឆ្នាំមុន ដែលបានក្លាយជាព្រះរាជាទី ១២៦ របស់ជប៉ុនបន្ទាប់ពីការដាក់រាជ្យ របស់ព្រះបិតាព្រះអង្គ៕
ប្រែសម្រួលៈ ណៃ តុលា
