ព័ត៌មានអន្តរជាតិ

រដ្ឋមន្ត្រីអាល្លឺម៉ង់ ស្វាគមន៍ការជាប់ឆ្នោត របស់លោក ចូ បៃដិន

បរទេស៖ រដ្ឋមន្ត្រីនានារបស់ប្រទេសអាល្លឺម៉ង់ តាមសេចក្តីរាយការណ៍ បានសម្តែងការអបអរសាទរចំពោះលោក ចូ បៃដិន ក្រោយបណ្ដាញផ្សព្វផ្សាយព័ត៌មានធំៗ បានប្រកាសថា លោកជាអ្នកឈ្នះការបោះឆ្នោតជ្រើសប្រធានាធិបតីអាមរិក នៅថ្ងៃសៅរ៍សប្ដាហ៍នេះ និងបានបង្ហាញនូវក្តីសង្ឃឹមថា នឹងមានការចាប់ផ្តើមថ្មីនិងការធ្វើឲ្យប្រសើរឡើង ក្នុងចំណងមិត្តភាពអន្តរអាត្លង់ទិក ដែលមានការជាប់គាំងធ្ងន់ធ្ងរ ដោយសារអ្នកកាន់តំណែងមុនរបស់លោក។ 

នៅលើបណ្ដាញសង្គមធ្វីតធ័រ រដ្ឋមន្ត្រីហិរញ្ញវត្ថុ លោក Olaf Scholz បានមានប្រសាសន៍ថា “សូមចូលរួមអបអរសាទរ លោកប្រធានាធិបតីជាប់ឆ្នោតថ្មី។ ឥឡូវនេះ មានឱកាសសម្រាប់ទំព័រដ៏គួរឲ្យរំភើបថ្មី នៅក្នុងចំណងមិត្តភាពអន្តរអាត្លង់ទិក ហើយសហរដ្ឋអាមេរិក នៅតែជាដៃគូដ៏សំខាន់បំផុតនិងជិតស្និទ្ធបំផុតរបស់អឺរ៉ុប”។ 

ចំណែករដ្ឋមន្ត្រីការបរទេសអាល្លឺម៉ង់ លោក Heiko Maas ក៏បាននិយាយលើបណ្ដាញសង្គមធ្វីតធ័រផងដែរថា យើងទន្ទឹងរង់ចាំធ្វើការងារជាមួយរដ្ឋបាលអាមេរិកថ្មី។ យើងចង់ធ្វើការវិនិយោគនៅក្នុងកិច្ចសហប្រតិបត្តិការរបស់យើង សម្រាប់ការចាប់ផ្តើមអន្តរអាត្លង់ទិកជាថ្មី និងកិច្ចព្រមព្រៀងថ្មី”៕ 

ប្រែសម្រួល៖ប៉ាង កុង 

To Top