ព័ត៌មានអន្តរជាតិ

ឃ្លាំងផ្ទុកវ៉ាក់សាំង បង្ការ ជំងឺកូវីដ១៩ របស់ប្រទេសជប៉ុន មិនមានផលប៉ះពាល់ ដោយការដាច់ ចរន្តអគ្គិសនី បណ្តាលមកពី ការរញ្ជួយដី ៧.៣រ៉ិកទ័រឡើយ

បរទេស៖ លោក Katsunobu Kato ប្រធានខុទ្ទកាល័យ បាននិយាយកាលពីថ្ងៃអាទិត្យថា ការដាច់ចរន្តអគ្គិសនីដែលបណ្តាលមកពីការរញ្ជួយដី នៅប្រទេសជប៉ុននាពេលថ្មីៗនេះ មិនបានធ្វើឱ្យប៉ះពាល់ដល់ ការផ្ទុកវ៉ាក់សាំងបង្ការជំងឺកូវីដ១៩ នៅសីតុណ្ហាភាព ដែលត្រូវការនោះទេ។

យោងតាមសារព័ត៌មាន Sputnik ចេញផ្សាយនៅថ្ងៃទី១៤ ខែកុម្ភៈ ឆ្នាំ២០២១ បានឱ្យដឹងដោយផ្អែកតាមការលើកឡើង របស់លោក Kato បានប្រាប់អ្នកយកព័ត៌មាន នៅពេលដែលត្រូវបានគេសួរថាតើកង្វះថាមពលអគ្គីសនីបានធ្វើឱ្យមានផលប៉ះពាល់ណាមួយ ដល់ការផ្ទុកវ៉ាក់សាំងដែរទេ លោកថា «ការផ្ទុកត្រូវបានអនុវត្ត នៅសីតុណ្ហភាពដែលត្រូវការ»។

ប្រទេសជប៉ុនបានទទួលវ៉ាក់សាំង Pfizer ចំនួន ៤០០ ០០០ ដូស កាលពីថ្ងៃសុក្រ ហើយក្រសួងសុខាភិបាលបានកំណត់ជាផ្លូវការ នូវថ្ងៃនៃការប្រើប្រាស់របស់ខ្លួនបន្ទាប់ពីគណៈកម្មាធិការសុខភាព របស់រដ្ឋាភិបាលបានអនុម័ត។

ក្រុមជំនាញផ្នែកសុខភាពបានអនុម័តវ៉ាក់សាំង Pfizer សម្រាប់មនុស្សទាំងអស់ ដែលមានអាយុលើសពី ១៦ ឆ្នាំ។ ការចាក់វ៉ាក់សាំងនេះត្រូវបានគេរំពឹងថា នឹងចាប់ផ្តើមនៅថ្ងៃពុធ ហើយបុគ្គលិកសុខាភិបាលចំនួន ២០ ០០០ នាក់ដែលបានយល់ព្រម ចូលរួមក្នុងការសិក្សាដើម្បីតាមដានផលប៉ះពាល់ណាមួយ ដែលអាចនឹងកើតមានមុនគេ។

សូមជម្រាបថា ការរញ្ជួយដីកម្រិត ៧.៣ រ៉ិចទ័របានវាយប្រហារភាគឦសាន ប្រទេសជប៉ុនកាលពីល្ងាចថ្ងៃសៅរ៍។ គ្រោះមហន្តរាយធម្មជាតិនេះបានបណ្តាលឱ្យមានអ្នករងរបួសជាង ១០០ នាក់ ដែលភាគច្រើននៅតំបន់ Fukushima និង Miyagi ខណៈដែលជិតមួយលានគ្រួសារ គ្មានអគ្គិសនីប្រើប្រាស់។ ការដាច់ភ្លើងភាគច្រើនត្រូវបានដោះស្រាយ នៅព្រឹកថ្ងៃអាទិត្យ៕ប្រែសម្រួលៈ ណៃ តុលា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top