បរទេស៖ ក្រសួងសុខាភិបាលជប៉ុន នៅថ្ងៃអាទិត្យនេះ បាននិយាយប្រាប់ថា ខ្លួនទើបបានអនុម័តឲ្យប្រើប្រាស់ជាផ្លូវការ នូវថ្នាំវ៉ាក់សាំងកូវីដ១៩របស់ក្រុមហ៊ុន Pfizer Inc ហើយនេះជាការអនុម័តបែបនេះ ដំបូងនៅក្នុងប្រទេស ស្របពេលបង្កើនកិច្ចខិតខំប្រឹងប្រែង ទប់ស្កាត់រលកនៃការឆ្លងមេរោគលើកទី៣ នៅមុនរដូវការកីឡាអូឡាំពិកនៅរដូវក្តៅ។
ការអនុម័តនេះ ត្រូវបានគេរំពឹងទុកយ៉ាងទូលំទូលាយ ក្រោយគណៈកម្មាធិការ រដ្ឋាភិបាលណែនាំឲ្យធ្វើការអនុម័ត កាលពីថ្ងៃសុក្រ ជាចំណុចដែលរដ្ឋមន្ត្រីសុខាភិបាលជប៉ុន លោក Norihisa Tamura និយាយថា ប្រទេសជប៉ុននឹងផ្តល់ការអនុម័តចុងក្រោយ ឲ្យឆាប់បំផុតតាមដែលអាចធ្វើបាន ។
តាមសេចក្តីរាយការណ៍ នាយករដ្ឋមន្ត្រីជប៉ុន លោក Yoshihide Suga បានមានប្រសាសន៍ថា ការចាក់ថ្នាំវ៉ាក់សាំង នឹងចាប់ផ្តើមពីពាក់កណ្ដាលសប្ដាហ៍ក្រោយ ដោយផ្តើមជាមួយបុគ្គលិក សុខាភិបាលចំនួនប្រមាណ ១០.០០០នាក់ ហើយរដ្ឋាភិបាលសង្ឃឹមថា នឹងធ្វើការផ្គត់ផ្គង់ឲ្យគ្រប់គ្រាន់ សម្រាប់ប្រជាជនទាំងអស់ នៅពាក់កណ្ដាលឆ្នាំនេះ។
គួរបញ្ជាក់ថា ផ្នែកជាច្រើននៃប្រទេសជប៉ុន នៅតែស្ថិតនៅក្រោមការដាក់ក្នុងភាពអាសន្ន ក្រោយរលកឆ្លងមេរោគលើកទី៣ វាយប្រហារនៅចុងឆ្នាំមុននេះ ប៉ុន្តែករណីឆ្លងថ្មីនិងការស្លាប់ បានថយចុះជាងក្នុងពេល ពីរសប្ដាហ៍កន្លងទៅ ៕
ប្រែសម្រួល៖ ប៉ាង កុង
