ព័ត៌មានអន្តរជាតិ

លោកស្រី អ៊ុងសាន ស៊ូជី ត្រូវបន្ដឃុំខ្លួនរហូតដល់ថ្ងៃទី១៧ ខែកុម្ភៈ ខណៈយោធាបង្ហាញ សញ្ញាបង្ក្រាបលើបាតុករ

រ៉ង់ហ្គូន៖ មេធាវីរបស់លោកស្រី អ៊ុងសាន ស៊ូជី បានឲ្យដឹងថា លោកស្រីស៊ូជី ដែលត្រូវបានបណ្តេញអំណាចនៅមីយ៉ាន់ម៉ា នឹងត្រូវបញ្ជូនទៅឃុំខ្លួនរហូតដល់ថ្ងៃពុធ ទី១៧ ខែកុម្ភៈ សម្រាប់សវនាការនៅតុលាការ ហើយនឹងមិនបង្ហាញខ្លួននៅថ្ងៃច័ន្ទ ដូចការរំពឹងទុកនោះទេ។

មេធាវីលោក Khin Maung Zaw បានប្រាប់អ្នកយកព័ត៌មានថា “យើងមកទីនេះដើម្បីបញ្ជូន លិខិតរបស់មេធាវីយើង និងពិភាក្សាជាមួយចៅក្រម យោងតាមការលើកឡើង របស់លោកបានឲ្យដឹងថា ការឃុំខ្លួន គឺរហូតដល់ថ្ងៃទី១៧ មិនមែនត្រឹមថ្ងៃនេះទេ” ។

ជាមួយគ្នានេះដែរ កម្លាំងសន្តិសុខនៅក្នុងប្រទេសមីយ៉ាន់ម៉ា បានបើកការបាញ់ប្រហារ ដើម្បីបំបែកក្រុមអ្នកតវ៉ា នៅឯរោងចក្រថាមពលមួយ កាលពីថ្ងៃអាទិត្យ និងរថពាសដែកបានរំកិលចូលទីក្រុងធំ ៗ ខណៈមេដឹកនាំយោធាថ្មី ប្រឈមមុខនឹងថ្ងៃទី៩ នៃបាតុកម្មប្រឆាំងរដ្ឋប្រហារ។

ក៏ដូចជាការធ្វើបាតុកម្ម ទ្រង់ទ្រាយធំនៅទូទាំងប្រទេស មេដឹកនាំយោធា កំពុងប្រឈមមុខនឹងកូដកម្ម របស់កម្មកររដ្ឋាភិបាល ដែលជាផ្នែកមួយនៃចលនាមិនគោរពស៊ីវិល ប្រឆាំងនឹងរដ្ឋប្រហារថ្ងៃទី០១ ខែកុម្ភៈ ដែលបានទម្លាក់រដ្ឋាភិបាលស៊ីវិល ដឹកនាំដោយលោកស្រីអ៊ុងសាន ស៊ូជី។

ទាហានត្រូវបានគេដាក់ពង្រាយ នៅរោងចក្រថាមពលនៅរដ្ឋកាឈិន ភាគខាងជើងប្រទេស ដែលនាំឱ្យមានការប្រឈមមុខជាមួយបាតុករដែលអ្នកខ្លះបាននិយាយថា ពួកគេជឿថា កងទ័ពមានបំណងផ្តាច់ចរន្តអគ្គិសនី។

កម្លាំងសន្តិសុខបានបណ្តេញ ក្រុមបាតុករនៅខាងក្រៅរោងចក្រមួយ ក្នុងទីក្រុងMyitkyina របស់រដ្ឋកាជីន។ ការផ្សាយផ្ទាល់តាមបណ្តាញ សង្គមហ្វេសប៊ុកបានបង្ហាញថា ទោះបីជាវាមិនច្បាស់ថាតើ ពួកគេកំពុងប្រើគ្រាប់កាំភ្លើងជ័រ ឬបាញ់គ្រាប់ពិតក៏ដោយ។

ប្រព័ន្ធផ្សព្វផ្សាយបានឲ្យដឹង នៅក្នុងទំព័រហ្វេសប៊ុកថា អ្នកកាសែតពីរនាក់មកពីសារព័ត៌មានចំនួន ៧៤ ដែលកំពុងផ្សាយផ្ទាល់ពីកន្លែងប្រឈមមុខ ដាក់គ្នាត្រូវបានចាប់ខ្លួន រួមជាមួយអ្នកកាសែត ៣ នាក់ផ្សេងទៀត៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top