វ៉ាស៊ីនតោន៖ សភាតំណាងរាស្រ្តសហរដ្ឋអាមេរិក នៅថ្ងៃពុធម្សិលមិញនេះបានអនុម័ត សេចក្តីព្រាងចុងក្រោយនៃច្បាប់ជំនួយសង្គ្រោះ ដែលមានទឹកប្រាក់ចំនួន ១,៩ទ្រីលានដុល្លារអាមេរិក ដែលត្រូវបានបញ្ជូនទៅតុ របស់លោកប្រធានាធិបតីលោក ចូ បៃដិន ដើម្បីចុះហត្ថលេខា។
សភាដែលគ្រប់គ្រងដោយ គណបក្សប្រជាធិបតេយ្យ បានអនុម័តសេចក្តីព្រាងចុងក្រោយ ស្តីពីការផ្តល់ជំនួយសង្គ្រោះបន្ទាន់ដោយសំឡេង ២២០-២១១ ស្ទើរតែនៅតាមបណ្តាជួរគណបក្ស។ ព្រឹទ្ធសភា បានអនុម័តសេចក្តីព្រាងច្បាប់នេះ ដោយសម្លេងឆ្នោត ៥០-៤៩ កាលពីសប្តាហ៍មុន បន្ទាប់ពីធ្វើការផ្លាស់ប្តូរ ចំពោះច្បាប់ដើមដែលអនុម័តដោយសភា។
ច្បាប់ដែលត្រូវបានគេស្គាល់ថា ជាច្បាប់ផែនការជួយសង្គ្រោះអាមេរិក ឆ្នាំ២០២១ រួមបញ្ចូលទាំងការចំណាយផ្ទាល់ថ្មីរហូតដល់ ១៤០០ដុល្លារ សម្រាប់ជនជាតិអាមេរិកភាគច្រើន ៣៥០ ពាន់លានដុល្លារ សម្រាប់រដ្ឋាភិបាលរដ្ឋ និងមូលដ្ឋានក៏ដូចជាមូលនិធិ ដើម្បីប្រយុទ្ធប្រឆាំងនឹងជំងឺរាតត្បាតដោយផ្ទាល់។ វាក៏ពង្រីកអត្ថប្រយោជន័ភាពអត់ ការងារធ្វើសហព័ន្ធប្រចាំសប្តាហ៍ ៣០០ ដុល្លារបន្ថែមទៀតរហូតដល់ខែកញ្ញា។
លេខាធិការសារព័ត៌មាន សេតវិមានលោកស្រី Jen Psaki បានឲ្យដឹងកាលពីថ្ងៃពុធថា លោកប្រធានាធិបតី ចូ បៃដិន គ្រោងនឹងចុះហត្ថលេខាលើកញ្ចប់ ជំនួយជាច្បាប់នៅថ្ងៃសុក្រស្អែកនេះ។
នៅឯសន្និសីទសារព័ត៌មាន នៅសេតវិមានលោក ស្រី Psaki បានលើកឡើងថា “យើងកំពុងបោះជំហានទៅមុខយ៉ាងលឿន ទៅលើការអនុវត្តច្បាប់នេះ ពីព្រោះយើងដឹងថា ប្រជាជនអាមេរិកត្រូវការជំនួយ ហើយត្រូវការវាឱ្យបានឆាប់ តាមដែលអាចធ្វើទៅបាន” ។
វាជាច្បាប់ទាក់ទងនឹងជំងឺឆ្លងលើកទី ៦ ដែលត្រូវបានអនុម័តដោយសភាសហរដ្ឋអាមេរិក ចាប់តាំងពីមានការរាតត្បាត ជាងមួយឆ្នាំកន្លងមក។ ភាពអសមត្ថភាពក្នុងការដោះស្រាយ លើវីរុសនេះបានបណ្តាលឱ្យ មានមនុស្សស្លាប់ជាង ៥២៨,០០០នាក់ នៅក្នុងប្រទេសរួចទៅហើយ។
ក្រុមអ្នកប្រជាធិបតេយ្យ បានប្រកាសពីវិធានការណ៍ ១,៩ទ្រីលានដុល្លារថា ជាច្បាប់ដែលមានប្រជាប្រិយបំផុតមួយ នៅក្នុងទសវត្សនេះដែលហៅវាថា ជាជំនួយសង្គ្រោះជំងឺកូវីដ-១៩ សម្រាប់ប្រជាជននៅទូទាំងប្រទេស ដែលអាចកាត់បន្ថយភាពក្រីក្រ និងជំរុញឱ្យមានការងើបឡើងវិញ ៕
ដោយ ឈូក បូរ៉ា
