បរទេស៖ មេដឹកនាំកូរ៉េខាងជើងលោកគីមជុងអ៊ុន បានផ្ញើសារផ្ទាល់មាត់ ទៅកាន់មេដឹកនាំ វៀតណាម និងឡាវ និងប្រទេស គុយបា ហើយបានអំពាវនាវឱ្យមាន ទំនាក់ទំនងរឹងមាំជាងនេះ នៅក្នុងសកម្មភាព មួយ ដែលទំនងជាមានគោលបំណង ពង្រឹងទំនាក់ទំនងជាមួយបណ្តា ប្រទេសសង្គមនិយម ចំពេលមានកិច្ចចរចានុយក្លេអ៊ែរជាប់គាំងជាមួយ សហរដ្ឋអាមេរិក។
យោងតាមសារព័ត៌មាន Korean Times ចេញផ្សាយនៅថ្ងៃទី២៤ ខែមីនា ឆ្នាំ២០២១ បានឱ្យដឹងថា យោងតាមទីភ្នាក់ងារសារព័ត៌មានកណ្តាលកូរ៉េ (KCNA) បានអោយដឹងថា លោកគីមបានផ្ញើសារ ដើម្បី“ ជូនដំណឹងអំពីសារៈសំខាន់សមាជលើកទី ៨ នៃ WPK គឺជាគណបក្សពលករនៃប្រទេសកូរ៉េ” ទៅកាន់ប្រធានាធិបតីវៀតណាមលោកង្វៀនភូត្រុង ប្រធានាធិបតីឡាវលោក ថងលូន ស៊ីសូលីត និងលោក Raul Castro លេខាទីមួយ នៃគណបក្សកុម្មុយនិស្តគុយបា ។
KCNA បន្ថែមថា នៅក្នុងសាររបស់ លោកគីម ក៏បានពិភាក្សានិងសម្រេចចិត្តលើគោលជំហររបស់កូរ៉េខាងជើង ក្នុងការជំរុញសមត្ថភាពការពារ ក៏ដូចជាលើទំនាក់ទំនងអន្តរកូរ៉េ និងទំនាក់ទំនង រវាងកូរ៉េខាងជើង – អាមេរិក។
លោកបានបញ្ជាក់ជា ថ្មីម្តងទៀតនូវឆន្ទៈរបស់ គណបក្ស ពលករនៃប្រទេសកូរ៉េ ក្នុងការអភិវឌ្ឍចំណង សាមគ្គីភាពនិងសហប្រតិបត្តិការ សាមគ្គីភាពជាយុទ្ធសាស្ត្រជាមួយគុយបា លើមាគ៌ា នៃការតស៊ូដើម្បីជ័យជំនះ នៃបុព្វហេតុសង្គមនិយម និងចាប់ផ្តើមការតស៊ូរួមគ្នាដ៏ខ្លាំងក្លាមួយប្រឆាំង នឹងចក្រពត្តិនិយម។
ក្នុងអំឡុងពេល នៃការប្រជុំគណបក្សសមាជ ទាំង ៨ កាលពីខែមករាលោកគីម បានអំពាវនាវឱ្យមានសាមគ្គីភាព និងសាមគ្គីភាពកាន់តែរឹងមាំជាមួយ ប្រទេសសង្គមនិយមដទៃទៀត៕
ប្រែសម្រួលៈ ណៃ តុលា
