បរទេស៖ប្រធានាធិបតីកូរ៉េខាងត្បូង លោក មូន ជេអ៊ីន នឹងជួបគ្នាផ្ទាល់ជាមួយប្រធានាធិបតីសហរដ្ឋអាមេរិក លោក ចូ បៃដិន នៅក្នុងទីក្រុងវ៉ាស៊ីនតោន នាខែក្រោយនេះ នេះបើតាមការបញ្ជាក់ពីសេតវិមាននិងវិមានខៀវប្រធានាធិបតីកូរ៉េខាងត្បូ។
លេខាធិការព័ត៌មានសេតវិមាន លោកស្រី Jen Psaki តាមសេចក្តីរាយការណ៍ បានមានប្រសាសន៍ប្រាប់នៅក្នុងសន្និសីទកាសែតមួយនាថ្ងៃព្រហស្បតិ៍សប្ដាហ៍នេះថា “លោកប្រធានាធិបតី បៃដិន រង់ចាំធ្វើការស្វាគមន៍លោកប្រធនាធិបតី មូន របស់សាធារណរដ្ឋកូរ៉េ នៅសេតវិមាន នាពាក់កណ្ដាលទីពីរនៃខែឧសភា”។
ប៉ុន្តែយោងតាមសេចក្តីរាយការណ៍មួយ ដែលចេញផ្សាយដោយទីភ្នាក់ងារសារព័ត៌មាន UPI នៅថ្ងៃទី១៦ ខែមេសា ឆ្នំា២០២១ បានឲ្យដឹងថា លោកស្រី Jen Psaki បានមានប្រសាសន៍ប្រាប់បន្តថា កាលបរិច្ឆេទនៃដំណើរទស្សនកិច្ចនោះ មិនទាន់ធ្វើការសម្រេចជាចុងក្រោយនៅឡើយនោះទេ។
លោកស្រីបានថ្លែងយ៉ាងដូច្នេះថា “ជំនួបកំពូលនោះនឹងគូសបង្ហាញសម្ពន្ធភាពដ៏រឹងមាំដូចដែករវាងអាមេរិកនិងកូរ៉េខាងត្បូង ព្រមចំណងទាក់ទងគ្នានិងមិត្តភាពដ៏យូរអង្វែងរវាងប្រជាជនរបស់ប្រទេសទាំងពីរ”៕
ប្រែសម្រួល៖ប៉ាង កុង
