ហ្សឺណែវ ៖ អង្គការសុខភាពពិភពលោក (WHO) បានឲ្យដឹងថា ការឆ្លងជំងឺកូវីដ-១៩ នៅទូទាំងពិភពលោក បានកើនឡើង សម្រាប់សប្តាហ៍ទី ៨ ដែលមានកំណត់ត្រា ៥,២ លានករណីកាលពីសប្តាហ៍មុន និងអត្រាកំណើន គួរឱ្យព្រួយបារម្ភ ចំពោះមនុស្សវ័យក្មេង ។
លោក Tedros Adhanom Ghebreyesus អគ្គនាយកអង្គការសុខភាព ពិភពលោក បានឲ្យដឹងនៅក្នុងសន្និសីទខ្លីមួយថា ចំនួនអ្នកស្លាប់ ក៏បានកើនឡើងផងដែរ នៅសប្តាហ៍ទី ៥ ជាប់គ្នាដែលធ្វើឲ្យចំនួនអ្នកស្លាប់ទូទាំងពិភពលោកកើនដល់ជាង ៣ លាននាក់។
ជំងឺរាតត្បាតកំពុងកើនឡើង យ៉ាងខ្លាំងនាពេលថ្មីៗនេះ យោងទៅតាមតួលេខ របស់អង្គការសុខភាពពិភពលោក។ ប្រធានអង្គការសុខភាពពិភពលោក បានលើកឡើងថា“ វាត្រូវចំណាយពេល ៩ ខែ ដើម្បីឈានដល់ការស្លាប់ ១ លាននាក់ ហើយ ៤ ខែទៀតឈានដល់ ២ លាននាក់ហើយ ៣ ខែទៀតឈានដល់ ៣ លាននាក់” ។
លោកបានបន្ដថា ទន្ទឹមនឹងនេះការឆ្លង និងតម្រូវការគ្រែមន្ទីរពេទ្យក្នុងចំណោមមនុស្ស ដែលមានអាយុពី ២៥ ទៅ ៥៩ ឆ្នាំកំពុងកើនឡើង ក្នុងអត្រាគួរឱ្យព្រួយបារម្ភមួយ ដែលអាចបណ្តាលមកពីលទ្ធផល នៃការឆ្លងទម្រង់ថ្មី ដែលអាចចម្លងបានខ្ពស់ និងបង្កើនការលាយបញ្ចូលគ្នា រវាងសង្គមក្នុងចំណោម មនុស្សវ័យក្មេង ។
ដើម្បីទប់ទល់នឹង តម្រូវការជាបន្ទាន់ សម្រាប់វ៉ាក់សាំងបង្កាជំងឺកូវីដ – ១៩ នៅទូទាំងពិភពលោកអង្គការ សុខភាពពិភពលោកបាន ចេញនូវចំណាប់អារម្មណ៍មួយ កាលពីថ្ងៃសុក្រ ចំពោះការបង្កើតមជ្ឈមណ្ឌលផ្ទេរ បច្ចេកវិទ្យាជំងឺកូវីដ-១៩ សម្រាប់វ៉ាក់សាំង mRNA ក្នុងគោលបំណងបង្កើន ការផលិតវ៉ាក់សាំងទាំងនោះ ក្នុងបណ្ដាប្រទេស ដែលមានប្រាក់ចំណូលទាប និងមធ្យម៕
ដោយ ឈូក បូរ៉ា
