វ៉ាស៊ីនតោន៖ ក្រសួងការបរទេសសហរដ្ឋអាមេរិក នៅថ្ងៃអង្គារម្សិលមិញនេះ បានបញ្ជាឱ្យបុគ្គលិក ដែលមិនចាំបាច់ចាកចេញ ពីស្ថានទូតសហរដ្ឋអាមេរិកនៅទីក្រុងកាប៊ុល ប្រទេសអាហ្វហ្គានីស្ថាន ដោយសារបញ្ហាសន្តិសុខ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
នាយកដ្ឋានរដ្ឋបានឲ្យដឹង នៅក្នុងទីប្រឹក្សាការធ្វើដំណើរថា ខ្លួនបាន “បញ្ជាឱ្យចាកចេញពីស្ថានទូតអាមេរិក នៅទីក្រុងកាប៊ុល នៃបុគ្គលិករដ្ឋាភិបាលសហរដ្ឋអាមេរិក ដែលមុខងាររបស់ពួកគេអាច ត្រូវបានអនុវត្តនៅកន្លែងផ្សេងទៀតបាន” ។
ភារៈធារីអាមេរិកប្រចាំ នៅអាហ្វហ្គានីស្ថានលោក រ៉ូសវីលសុន បានលើកឡើងថា ការចាកចេញនេះត្រូវបានអនុម័ត “ដោយមើលឃើញពីការកើនឡើង នូវរបាយការណ៍អំពើហឹង្សា និងការគំរាមកំហែងនៅទីក្រុងកាប៊ុល”។
លោកបានបន្ថែមថា ការចាកចេញនេះនឹងជះឥទ្ធិពលដល់“ បុគ្គលិកមួយចំនួនតូចនៅ ស្ថានទូតអាមេរិកប្រចាំក្រុងកាប៊ុល ហើយមានប្រសិទ្ធិភាពអនុវត្ដភ្លាមៗ” ។
ការផ្លាស់ប្តូរនេះបានកើតឡើងប៉ុន្មានថ្ងៃមុនថ្ងៃទី០១ ខែឧសភា ដែលជាថ្ងៃដែលលោកប្រធានាធិបតី ចូ បៃដិន បានប្រកាសកាលពីដើមខែនេះថា សហរដ្ឋអាមេរិក និងកងទ័ពណាតូ នឹងចាប់ផ្តើមដកខ្លួនចេញពី ប្រទេសអាហ្វហ្គានីស្ថាន។
យ៉ាងណាក៏ដោយអតីតរដ្ឋបាលលោក ដូណាល់ ត្រាំ និងក្រុមតាលីបង់អាហ្វហ្គានីស្ថាន បានកំណត់យកថ្ងៃទី១ ឧសភា ជាថ្ងៃផុតកំណត់ក្នុងការដកកងទ័ព សហរដ្ឋអាមេរិកចេញពីប្រទេស។ នៅក្នុងនោះដែរ ពួកតាលីបង់ បានព្រមានពីផលវិបាកនានា ប្រសិនបើរដ្ឋបាលលោក បៃដិន ខកខានមិនបានអនុវត្តតាមឱសានវាទនោះ ៕
ដោយ ឈូក បូរ៉ា
