វ៉ាស៊ីនតោន ៖ មន្ត្រីជាន់ខ្ពស់ក្រសួងការបរទេស មួយរូបបានឲ្យដឹង នៅថ្ងៃព្រហស្បតិ៍ម្សិលមិញនេះថា សហរដ្ឋអាមេរិក និងអ៊ីរ៉ង់អាចសម្រេច បាននូវការវិលត្រឡប់ទៅវិញទៅមក ដើម្បីអនុលោមតាមកិច្ចព្រមព្រៀងនុយក្លេអ៊ែរអ៊ីរ៉ង់ នៅប៉ុន្មានសប្តាហ៍ខាងមុខនេះ ប្រសិនបើទីក្រុងតេអេរ៉ង់ ធ្វើការសម្រេចចិត្តនយោបាយ ។
មន្ត្រីជាន់ខ្ពស់រូបនេះបានឲ្យដឹង នៅក្នុងសន្និសីទសារព័ត៌មាន តាមទូរស័ព្ទថា កិច្ចចរចាដោយប្រយោលបីលើកចុងក្រោយ រវាងសហរដ្ឋអាមេរិក និងអ៊ីរ៉ង់ នៅទីក្រុងវីយែន បានជួយធ្វើឱ្យជម្រើស មានភាពប្រសើរឡើង ប៉ុន្តែមិនមានអ្វីត្រូវបានព្រមព្រៀងគ្នាលើវិធីធ្វើកិច្ចព្រមព្រៀង នុយក្លេអ៊ែរឡើងវិញ ដែលត្រូវបានគេស្គាល់ថា ផែនការសកម្មភាពរួម (JCPOA) នោះទេ ។
មន្ត្រីរូបនោះបានប្រាប់អ្នកយកព័ត៌មាន ក្នុងលក្ខខណ្ឌអនាមិកថា “ប្រសិនបើអ៊ីរ៉ង់ ធ្វើការសម្រេចចិត្ត នយោបាយ ដែលខ្លួនចង់វិលត្រឡប់ទៅ JCPOA វិញ នៅពេលដែល JCPOA ត្រូវបានចរចា បន្ទាប់មកវា អាចត្រូវបានធ្វើយ៉ាង ឆាប់រហ័សហើយការអនុវត្ត អាចនឹងលឿន ប៉ុន្តែយើងមិនដឹងថា តើអ៊ីរ៉ង់បានធ្វើការ សម្រេចចិត្តនោះទេ” ។
លោកបានបន្ដថា “នៅតែមានការងារជាច្រើន ត្រូវធ្វើនៅក្នុងលក្ខខណ្ឌ នៃការយល់ព្រមលើទណ្ឌកម្មជំហាន នុយក្លេអ៊ែរ ប៉ុន្តែក៏មានលំដាប់លំដោយ និងកាលវិភាគ សម្រាប់ការអនុវត្តជំហាន ដែលភាគីទាំងពីរនឹងត្រូវធ្វើ” ។
មន្ត្រីរូបនោះបានស្នើថា វាអាចទៅរួចសម្រាប់ ទីក្រុងវ៉ាស៊ីនតោន និង តេអេរ៉ង់ ដើម្បីសម្រេចបាននូវការវិល ត្រឡប់ទៅរកការអនុលោមទៅវិញ ទៅមកនៅក្នុងរយៈពេលប៉ុន្មាន សប្តាហ៍ខាងមុខនេះ ស្របពេល ដែលសង្កត់ធ្ងន់ថា “នេះជាបញ្ហាចុងក្រោយ នៃការសម្រេចចិត្តនយោបាយ ដែលត្រូវធ្វើនៅអ៊ីរ៉ង់” ៕ដោយ ឈូក បូរ៉ា
