ព័ត៌មានអន្តរជាតិ

កងទ័ពអ៊ីស្រាអែល ប្រមូលផ្តុំគ្នា នៅព្រំដែនតំបន់ហ្គាហ្សា ស្របពេលមានការ វាយប្រហារដោយគ្រាប់រ៉ុកកែត និងការវាយប្រហារ តាមអាកាស

បរទេស ៖ ប្រទេសអ៊ីស្រាអែល នៅថ្ងៃព្រហស្បតិ៍នេះ បានត្រៀមរៀបចំដាក់ពង្រាយ កងទ័ពជើងគោក នៅតាមព្រំដែន តំបន់ហ្គាហ្សា ហើយពួកហាម៉ាស បានធ្វើការវាយប្រហារ ដោយគ្រាប់រ៉ុកកែតទៅលើប្រទេស អ៊ីស្រាអែល ស្របពេលដែលមានការ អំពាវនាវអន្តរជាតិកើនឡើង ឲ្យបញ្ចប់ការប្រយុទ្ធគ្នានោះ។

ប៉ូលីសអ៊ីស្រាអែល បាននិយាយថា គ្រាប់រ៉ុកកែតមួយគ្រាប់ ដែលបាញ់ចេញពីបរិវេណ តំបន់ប៉ាឡេស្ទីន បានវាយប្រហារចំអគារមួយ នៅជិតរដ្ឋធានីអ៊ីស្រាអែល គឺទីក្រុងតេលអាវីវ ធ្វើឲ្យជនជាតិ អ៊ីស្រាអែល ៥នាក់រងរបួស ហើយសម្លេងសារ៉ែន បានបន្លឺឡើងក្នុងទីក្រុង នៅទូទាំងអ៊ីស្រាអែល ភាគខាងត្បូង ឲ្យមនុស្សរាប់ពាន់នាក់ រត់រកទីសុវត្ថិភាព ។

តាមសេចក្តីរាយការណ៍មួយ ពីទីភ្នាក់ងារសារព័ត៌មានចេញផ្សាយ នៅថ្ងៃទី១៣ ខែឧសភា ឆ្នាំ២០២១ បានឲ្យដឹងថា ប្រទេសអ៊ីស្រាអែល បានត្រៀមរៀបចំកងទ័ពប្រយុទ្ធ នៅតាមព្រំដែនតំបន់ហ្គាហ្សា និងកំពុងស្ថិតក្នុងដំណាក់កាលផ្សេងៗគ្នា នៃការត្រៀមប្រតិបត្តិការ។

គួរបញ្ជាក់ថា យ៉ាងហោចណាស់មានមនុស្សចំនួន៧២នាក់ បានស្លាប់បាត់បង់ជីវិតនៅក្នុងតំបន់ហ្គាហ្សា ចាប់តាំងពីការប្រយុទ្ធគ្នាផ្ទុះខ្លាំងឡើងនៅថ្ងៃចន្ទ ហើយក្រុមគ្រូពេទ្យនិយាយថា មន្ទីរពេទ្យកាន់តែកក់ស្ទះបន្ថែមទៀត ស្របពេល ដែលកំពុងស្ថិតក្រោមសម្ពាធ ពីការរាតត្បាតឆ្លង នៃជម្ងឺកូវីដ១៩។ យោធាបាននិយាយថា នៅក្នុងប្រទេសអ៊ីស្រាអែល មានមនុស្ស៧នាក់ស្លាប់ ៕ ប្រែសម្រួល៖ប៉ាង កុង

To Top