ព័ត៌មានអន្តរជាតិ

ជប៉ុន ព្រមានថា អាចបង្កកជំនួយ ដល់មីយ៉ាន់ម៉ា ខណៈរបបយោធា នៅតែបន្តប្រើកម្លាំង ឃោរឃៅមកលើ ពលរដ្ឋស្លូតត្រង់

តូក្យូ៖ ទូរទស្សន៍សិង្ហបុរី Channel News Asia បានផ្សព្វផ្សាយ នៅថ្ងៃទី២២ ខែឧសភា ឆ្នាំ២០២១ថា រដ្ឋមន្រ្តីក្រសួង ការបរទេសជប៉ុន បានព្រមាន នៅក្នុងបទសម្ភាសន៍មួយ ដែលត្រូវបានចេញផ្សាយ កាលពីថ្ងៃសុក្រថា ក្រុងតូក្យូ អាចបង្កក ជំនួយទាំងអស់ ដល់មីយ៉ាន់ម៉ា ខណៈដែលរបបយោធា នៅតែបន្តប្រើប្រាស់កម្លាំង ដ៍សាហាវប្រឆាំងនឹងគូប្រជែង នៃរដ្ឋប្រហាររបស់ខ្លួន ។

ប្រទេសជប៉ុន គឺជាអ្នកផ្តល់ជំនួយដល់ប្រទេសមីយ៉ាន់ម៉ា ហើយបានផ្អាកជំនួយថ្មីរួចទៅហើយ បន្ទាប់ពីយោធាបាន បណ្តេញមេដឹកនាំស៊ីវិល លោកស្រី អ៊ុងសាន ស៊ូជី ។

ប៉ុន្តែលោក Toshimitsu Motegi ថ្លែងទៅកាន់កាសែត Nikkei ថា ការបង្កកអាចត្រូវបានបន្ថែមទៀត ។

លោកបានប្រាប់ដល់កាសែតខាងលើថា “យើងមិនចង់ធ្វើវាទាល់តែសោះ ប៉ុន្តែយើងត្រូវតែបញ្ជាក់យ៉ាងម៉ឺងម៉ាត់ថា វានឹងពិបាកក្នុងការបន្តស្ថិតនៅក្រោមកាលៈទេសៈទាំងនេះ” ។

ក្នុងនាមជាប្រទេសមួយ ដែលគាំទ្រលទ្ធិប្រជាធិបតេយ្យ របស់មីយ៉ាន់ម៉ា តាមវិធីផ្សេងៗគ្នា ហើយក្នុងនាមជាមិត្ត យើងត្រូវតែធ្វើជាតំណាង សហគមន៍អន្តរជាតិ និងបង្ហាញយ៉ាងច្បាស់ពីបញ្ហានេះ ។

យោងតាមសារព័ត៌មាន Nikkei ប្រទេសជប៉ុន បានផ្តល់ជំនួយអភិវឌ្ឍន៍ចំនួន១,៧៤ពាន់លានដុល្លារដល់ប្រទេសមីយ៉ាន់ម៉ា ក្នុងឆ្នាំសារពើពន្ធ២០១៩ ច្រើនជាងប្រទេសដទៃទៀត ដែលមានតួលេខបង្ហាញឲ្យដឹង ។ តួលេខជំនួយរបស់ចិន មិន មែនសម្រាប់សាធារណៈ នោះទេ ។
គួរបញ្ជាក់ថា មនុស្សជាង៨០០នាក់ត្រូវបានសម្លាប់នៅក្នុងប្រទេស មីយ៉ាន់ម៉ា នៅក្នុងពេលមានភាពចលាចលចាប់ តាំងពីយោធាបានបណ្តេញលោកស្រី អ៊ុងសាន ស៊ូជី នៅក្នុងរដ្ឋប្រហារថ្ងៃទី០១ ខែកុម្ភៈ ៕
ប្រែសម្រួលដោយ៖ ម៉ៅ បុប្ផាមករា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top