ព័ត៌មានអន្តរជាតិ

ចិន គ្រោងពង្រឹង កិច្ចសហប្រតិបត្ដិការខ្សែក្រវ៉ាត់ និងផ្លូវ BRI ជាមួយអូទ្រីស

ប៉េកាំង៖ ប្រធានាធិបតីចិនលោក ស៊ី ជីនពីង បានឲ្យដឹងថា លោកត្រៀមខ្លួនធ្វើការ ជាមួយសមភាគីអូទ្រីសគឺលោក Alexander Van der Bellen ដើម្បីពង្រឹងកិច្ចសហប្រតិបត្តិការ លើការកសាងខ្សែក្រវ៉ាត់ និងផ្លូវ BRI រួមគ្នា នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

នៅក្នុងសាររបស់លោកបាន ផ្លាស់ប្តូរជាមួយប្រធានាធិបតីអូទ្រីស ដើម្បីអបអរសាទរខួបលើកទី ៥០ នៃការបង្កើតទំនាក់ទំនង ការទូតទ្វេភាគីលោកស៊ី បានលើកឡើងថា លោកយកចិត្តទុកដាក់យ៉ាងខ្លាំង ចំពោះទំនាក់ទំនងចិន – អូទ្រីស ហើយត្រៀមខ្លួនជានិច្ច ដើម្បីលើកកម្ពស់ភាពជា ដៃគូយុទ្ធសាស្ត្រមិត្តភាពចិន – អូទ្រីសដល់កម្រិតថ្មី ដើម្បីនាំមកនូវផលប្រយោជន៍ដល់ប្រទេស និងប្រជាជនទាំងពីរ។

លោកស៊ី បានគូសបញ្ជាក់ថា ចាប់តាំងពីការបង្កើតទំនាក់ទំនង ការទូតទ្វេភាគីកាលពី ៥០ ឆ្នាំមុន ប្រទេសចិន និងអូទ្រីស បានប្រកាន់ខ្ជាប់នូវគោលការណ៍ នៃការគោរពគ្នាទៅវិញទៅមក ការជឿទុកចិត្តគ្នាទៅវិញទៅមក និងឈ្នះ – ឈ្នះ ដែលជំរុញការអភិវឌ្ឍនៃ ចំណងទាក់ទងជាប្រចាំ។

លោកស៊ី បានបន្ថែមថា ចាប់តាំងពីប្រទេសទាំងពីរបាន បញ្ជាក់ពីការបង្កើតភាពជាដៃគូ យុទ្ធសាស្ត្រក្នុងឆ្នាំ២០១៨ មកទំនាក់ទំនងទ្វេភាគី បានឃើញនូវឱកាសអភិវឌ្ឍន៍ថ្មីៗ ដោយលោកបានបន្ថែមទៀតថា ប្រទេសទាំងពីរបាននិងកំពុង បង្កើននូវការជឿទុកចិត្តគ្នាទៅវិញទៅមក ខាងនយោបាយ និងស្វែងរកកិច្ចសហប្រតិបត្តិការ ជាក់ស្តែងនៅក្នុងវិស័យផ្សេងៗ។

លោកស៊ី បានគូសបញ្ជាក់ថា ក្នុងអំឡុងពេលនៃការប្រយុទ្ធរួមគ្នា ប្រឆាំងនឹងរោគរាតត្បាតកូវីដ-១៩ ភាគីទាំងពីរបានជួយគ្នា និងពង្រឹងមិត្តភាពរវាង ប្រជាជននៃប្រទេសទាំងពីរ។

នៅក្នុងសាររបស់លោក Van der Bellen បានឲ្យដឹងផងដែរថា ការបង្កើតភាពជាដៃគូយុទ្ធសាស្រ្តមិត្តភាពរវាងអូទ្រីស និងចិន គឺជាព្រឹត្តិការណ៍សំខាន់មួយក្នុង ការអភិវឌ្ឍទំនាក់ទំនងទ្វេភាគី ៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top