ព័ត៌មានអន្តរជាតិ

ឥណ្ឌា បើកទីក្រុងធំៗឡើងវិញ ស្របពេលករណី ឆ្លងជម្ងឺកូវីដថ្មីធ្លាក់ចុះ

បរទេស៖ ទីក្រុងធំៗក្នុងប្រទេសឥណ្ឌា តាមសេចក្តីរាយការណ៍ បានបើកសម្រាប់ពាណិជ្ជកម្ម ឡើងវិញនៅថ្ងៃចន្ទនេះ ដោយមានមនុស្សតម្រង់ជួរ ដើម្បីជិះរថយន្តក្រុងនៅមជ្ឈមណ្ឌលហិរញ្ញវត្ថុ គឺទីក្រុងម៉ុមបៃ ស្របពេលដែលចរាចរណ៍ បានវិលត្រឡប់មានសកម្មភាពវិញ នៅតាមដងផ្លូវក្នុងទីក្រុងញូដេលី ក្រោយទទួលរងរលកទីពីរ នៃមេរោគកូរ៉ូណា ដែលបានសម្លាប់មនុស្សរាប់សែននាក់ ។

ករណីឆ្លងថ្មីចំនួន ១០០.៦៣៦កក្នុងពេល ២៤ម៉ោងកន្លងទៅ គឺជាចំនួនដ៏ទាបបំផុត នៅក្នុងប្រទេសមានប្រជាជនច្រើន បំផុតលំដាប់ទី២លើពិភពលោកនេះ គិតចាប់តាំងពីថ្ងៃទី៦ ខែមេសាមក និងការបានធូរស្បើយពីសន្ទុះ កើនខ្ពស់កាលពីខែមុន ដែលមានចំនួនជាង ៤០០.០០០ករណី ជាហេតុអនុញ្ញាតឲ្យអាជ្ញាធរ បើកឡើងវញនូវផ្នែកនៃសេដ្ឋកិច្ច ។

យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន Us News នៅថ្ងៃទី០៧ ខែមិថុនា ឆ្នាំ២០២១ បានឲ្យដឹងថា លោក Arvind Kejriwal ជាអភិបាលក្រុងញូដេលី បានមានប្រសាសន៍លើ បណ្ដាញសង្គមធ្វីតធ័រយ៉ាងដូច្នេះថា “យើងត្រូវតែសង្គ្រោះខ្លួនយើងចេញពីការឆ្លង ប៉ុន្តែក៏ត្រូវនាំសេដ្ឋកិច្ច វិលត្រឡប់មកវិញផងដែរ”។

លោកបានបញ្ជាឲ្យពាក់កណ្ដាល នៃហាងក្នុងទីក្រុងញូដេលីបើកដំណើរដំណើរការ នៅថ្ងៃលេខសេស និងថ្ងៃលេខគូនៃខែផ្សេងៗគ្នា ក្នុងគោលបំណងកំណត់ កម្រិតចំនួនហ្វូងមនុស្ស ប៉ុន្តែបានអនុញ្ញាតការិយាល័យ និងផ្លូវដែកក្រោមដីនៃទីក្រុងញូដេលី ដំណើរការក្នុងកម្រិត ៥០ភាគរយ ៕

ប្រែសម្រួល៖ ប៉ាង កុង

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top