ព័ត៌មានអន្តរជាតិ

មហាអំណាចចិន-អាមេរិក កំពុងស្វែងរកដំណោះស្រាយ លើជម្លោះទ្វេភាគី និងលើកកម្ពស់ កិច្ចសហប្រតិបត្ដិការ ពាណិជ្ជកម្ម និងវិនិយោគ

ប៉េកាំង៖ ប្រទេសចិន និងសហរដ្ឋអាមេរិក បានធ្វើកិច្ចចរចា ស្តីពីបញ្ហាសេដ្ឋកិច្ចជាលើកទី ៣ ក្នុងរយៈពេលពីរសប្តាហ៍ នៅថ្ងៃព្រហស្បតិ៍នេះ ដោយទីក្រុងប៉េកាំង បានឲ្យដឹងថា រដ្ឋមន្រ្តីពាណិជ្ជកម្មរបស់ខ្លួន បានធ្វើការពិភាក្សាគ្នាដោយត្រង់ៗ តាមទូរស័ព្ទជាមួយ សមភាគីអាមេរិក។

រដ្ឋមន្រ្តីពាណិជ្ជកម្មចិនលោក Wang Wentao និងសមភាគីអាមេរិកលោក Gina Raimondo បានអះអាងថា ប្រទេសមហាអំណាច ទាំងពីររបស់ពិភពលោក នឹងខិតខំដោះស្រាយជម្លោះរបស់ពួកគេឱ្យបានសមស្រប និងលើកកម្ពស់កិច្ចសហប្រតិបត្តិការកម្រិតការងារ លើពាណិជ្ជកម្ម និងវិនិយោគ។

យោងតាមក្រសួងពាណិជ្ជកម្មចិន បានឱ្យដឹងថាលោក Wang និងលោក Raimondo ក៏បានយល់ព្រមផងដែរថា ទីក្រុងប៉េកាំង និងទីក្រុងវ៉ាស៊ីនតោន នឹងបន្តទំនាក់ទំនងគ្នា ដើម្បីដោះស្រាយជម្លោះអូសបន្លាយ រវាងប្រទេសទាំងពីរ។

នៅថ្ងៃទី ២៧ ខែឧសភា ឧបនាយករដ្ឋមន្ត្រីចិនលោក លីវ ហេ ដែលជាប្រធានអ្នកចរចា ពាណិជ្ជកម្មចិនជាមួយសហរដ្ឋអាមេរិក និងសមភាគីអាមេរិកលោកស្រី Katherine Tai បានជជែកគ្នាតាមទូរស័ព្ទនៅក្នុងកិច្ចពិភាក្សាលើកដំបូងរបស់ពួកគេ ចាប់តាំងពីការចាប់ផ្តើមរដ្ឋបាលរបស់ប្រធានាធិបតីអាមេរិកលោក ចូ បៃដិន កាលពីខែមករា។

នៅក្នុងនោះដែរ ការិយាល័យតំណាងពាណិជ្ជកម្មសហរដ្ឋអាមេរិក បានឲ្យដឹងនៅក្នុងសេចក្តីថ្លែងការណ៍ មួយថា លោកស្រី Katherine Tai បានលើកឡើងពីបញ្ហាដែលគួរឱ្យព្រួយបារម្ភក្នុងអំឡុង ពេលសន្ទនាតាមទូរស័ព្ទទោះបីជាលោកស្រី មិនបានបញ្ជាក់លម្អិតក៏ដោយ៕ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×