ព័ត៌មានអន្តរជាតិ

សហភាពអឺរ៉ុប៖ ភាគីក្នុងកិច្ចព្រមព្រៀង នុយក្លេអ៊ែអ៊ីរ៉ង់ នឹងជួបប្រជុំ នៅថ្ងៃអាទិត្យនេះ

បរទេស៖ សហភាពអឺរ៉ុប បាននិយាយនៅថ្ងៃសៅរ៍ម្សិលមិញនេះ ភាគីដែលកំពុងតែចរចា ឲ្យមានការស្តារឡើងវិញ នូវកិច្ចព្រមព្រៀងនុយក្លេអ៊ែអ៊ីរ៉ង់ នឹងបើកកិច្ចប្រជុំផ្លូវការមួយ នៅក្នុងទីក្រុងវីយែន នាថ្ងៃអាទិត្យនេះ នេះបើតាមការចេញផ្សាយមួយ របស់ទីភ្នាក់ងារសារព័ត៌មាន Us News នៅថ្ងៃទី២០ ខែមិថុនា ឆ្នាំ២០២១។ 

ប្រទេសអ៊ីរ៉ង់ និងមហាអំណាចពិភពលោកចំនួន៦ នាពេលបច្ចុប្បន្ននេះ កំពុងតែធ្វើការចរចាគ្នា នៅក្នុងទីក្រុងវីយែន ចាប់តាំងពីខែមេសាមក ដើម្បីដាក់ចេញវិធានការឲ្យទីក្រុងវ៉ាស៊ីនតោននិងទីក្រុងតេអេរ៉ង់អនុវត្តតាម។

នៅក្នុងឆ្នាំ២០១៨ សហរដ្ឋអាមេរិកបានដកខ្លួនចេញ ពីកិច្ចព្រមព្រៀងនុយក្លេអ៊ែ ដែលអ៊ីរ៉ង់បានទទួលយកការទប់ស្កាត់ លើកម្មវិធីនុយក្លេអ៊ែរបស់ខ្លួន ក្នុងការដូរយកការលើកលែងទណ្ឌកម្មបរទេសជាច្រើនមកលើខ្លួន។ 

មន្ត្រីក្នុងកិច្ចចរចានោះ នាពេលថ្មីៗនេះ បានបង្ហាញថា ភាពខុសគ្នានៅតែមានលើបញ្ហាសំខាន់ៗ ហើយលោក  Mikhail Ulyanov ជាប្រេសិតរុស្ស៊ីដែលចូលរូមក្នុងកិច្ចពិភាក្សាគ្នានោះ បាននិយាយលើបណ្ដាញសង្គមធ្វីតធ័រថា “គណៈកម្មការចម្រុះនៃកិច្ចព្រមព្រៀង នោះ នឹងជួបប្រជុំគ្នានៅថ្ងៃអាទិត្យ ទី២០ ខែមិថុនានេះ”។ 

ប្រេសិតទទួលបន្ទុកក្នុងកិច្ចការចរចា របស់រុស្ស៊ីរូបនេះ តាមសេចក្តីរាយការណ៍ បានមានប្រសាសន៍បន្ថែមទៀតយ៉ាងដូច្នេះថា “វានឹងសម្រេចចិត្តលើផ្លូវឆ្ពោះទៅមុខ នៅក្នុងកិច្ចពិភាក្សាគ្នានៅទីក្រុងវីយែន ហើយកិច្ចព្រមព្រៀងគ្នាមួយ លើការស្តារឡើងវិញនៃកិច្ចព្រមព្រៀងនុយក្លេអ៊ែនោះ គឺកំពុងស្ថិតនៅក្នុងទី ដែលអាចសម្រេចបាន ប៉ុន្តែនៅមិនទាន់បញ្ចប់ជាចុងក្រោយនៅឡើយនោះទេ”៕ ប្រែសម្រួល៖ប៉ាង កុង 

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top