បរទេស៖ រដ្ឋាភិបាលហុងកុងបាននិយាយនៅថ្ងៃច័ន្ទថា ខ្លួននឹងកាត់បន្ថយរយៈពេលនៃការធ្វើចត្តាឡីស័កសំរាប់អ្នកដែលបានចាក់វ៉ាក់សាំងបង្ការជំងឺកូវីដ១៩រួច ទី១៤ ថ្ងៃ មកត្រឹម ៧ថ្ងៃ ដោយផ្តល់ឱ្យអ្នកដំណើរបង្ហាញ អង្គបដិប្រាណគ្រប់គ្រាន់ប្រឆាំងនឹងវីរុសនេះ។
យោងតាមសារព័ត៌មាន Bangkok Post ចេញផ្សាយនៅថ្ងៃទី២១ ខែមិថុនា ឆ្នាំ២០២១ បានឱ្យដឹងថា មេដឹកនាំហុងកុង លោកស្រី Carrie Lam និយាយនៅក្នុងសន្និសីទសារព័ត៌មានថា វិធានការថ្មីនេះអាចអនុវត្តបាន ចំពោះតែអ្នកដែលបានចូលរយៈពេល ១៤ ថ្ងៃបន្ទាប់ពីទទួលថ្នាំបង្ការលើកទី ២ ។ លោកស្រីបាននិយាយថាការផ្លាស់ប្តូរច្បាប់នេះនឹងចូលជាធរមានចាប់ពីចុងខែនេះទៅ។
ទីក្រុងដែលគ្រប់គ្រងដោយប្រទេសចិនមួយនេះ មានវិន័យដាច់ខាតមួយចំនួននៅទូទាំងពិភពលោកជាមួយអ្នកស្រុក ដែលត្រូវបានតម្រូវឱ្យស្នាក់នៅរហូតដល់ 21 ថ្ងៃនៅក្នុងសណ្ឋាគារបន្ទាប់ពីបានមកដល់។
វិធានការដើម្បីកាត់បន្ថយរយៈពេលនៃការធ្វើចត្តាឡីស័កនេះ បានកើតឡើងនៅពេលដែលរដ្ឋាភិបាលព្យាយាមលើកទឹកចិត្តបន្ថែមទៀត ដល់ប្រជាជនចំនួន ៧.៥ លាននាក់របស់ខ្លួន ដើម្បីទទួលបានវ៉ាក់សាំង Covid-19 ។ រហូតមកដល់ពេលនេះមានតែប្រជាជនប្រមាណ ១៧% ប៉ុណ្ណោះ ដែលបានទទួលការចាក់វ៉ាក់សាំងពេញលេញចាប់តាំងពីគម្រោងនេះបានចាប់ផ្តើមនៅក្នុងខែកុម្ភៈ៕
ប្រែសម្រួលៈ ណៃ តុលា
