ព័ត៌មានអន្តរជាតិ

ទីក្រុងហាណូយ នឹងអនុញ្ញាតឱ្យភោជនីយដ្ឋាន ទទួលអតិថិជន ចូលមកហូប ក្នុងហាងវិញបាន

បរទេស ៖ អាជ្ញាធរទីក្រុង ហាណូយ បានប្រកាសថា ភោជនីយដ្ឋាន និងហាងកាត់សក់ អាចចាប់ផ្តើម បម្រើអតិថិជន ក្នុងហាងបាន ចាប់ពីថ្ងៃអង្គារនេះតទៅ ។ លោក Chu Xuan Dung អនុប្រធានទីក្រុងហាណូយ បាននិយាយកាលពីថ្ងៃចន្ទថា បណ្តាហាងទាំងនោះត្រូវតែ គោរពតាមគោលការណ៍ ណែនាំបង្ការជំងឺកូវីដ-19 ។

យោងតាមសារព័ត៌មាន VN Express ចេញផ្សាយនៅថ្ងៃទី២១ ខែមិថុនា ឆ្នាំ២០២១ បានឱ្យដឹងថា រដ្ឋធានីហាណូយ បានបិទអាជីវកម្ម និងសេវាកម្ម ដែលមិនចាំបាច់ចាប់ពីថ្ងៃទី ២៩ ខែមេសា ដោយចាប់ផ្តើមពីហាងខារ៉ាអូខេ បន្ទាប់មកភោជនីយដ្ឋាន និងហាងកាហ្វេ ហើយក្រោយមករោងកុន កន្លែងហាត់ប្រាណ និងហាងកាត់សក់។

លោក Tran Dac Phu អតីតប្រធាននាយកដ្ឋានទូទៅ នៃថ្នាំបង្ការ នៅក្រសួងសុខាភិបាល បានព្រមានកាលពីថ្ងៃសៅរ៍ថា ការផ្ទុះឡើងនៅតែកើតមាននៅក្នុងប្រទេស ហើយទីក្រុងហាណូយ នៅតែអាចធ្វើឱ្យមានករណី ឆ្លងនៅក្នុងសហគមន៍។

លោកថា “ ដំណើរការបើកឡើងវិញ ចាំបាច់ត្រូវធ្វើដោយ យកចិត្តទុកដាក់ រួមជាមួយការត្រួតពិនិត្យ យ៉ាងម៉ត់ចត់ ។ ទីក្រុងហាណូយបានកត់ត្រា ករណីឆ្លងជំងឺកូវីដ-19 ក្នុងតំបន់ចំនួន ៤៦៥នាក់ នៅក្នុងរលកឆ្លងមេរោគឆ្លង ចុងក្រោយបង្អស់របស់វៀតណាមក្នុងនោះមាន ១៤៨ ករណី ឆ្លងនៅក្នុងមន្ទីរពេទ្យចំនួនពីរ ដែលត្រូវបានរាំងខ្ចប់។

ចាប់តាំងពីថ្ងៃទី ២៧ ខែមេសា ប្រទេសវៀតណាម បានកត់ត្រាការឆ្លងវីរុស ក្នុងសហគមន៍ចំនួន ១០ ០៧៨នាក់ នៅក្នុងទីក្រុងនិងខេត្តចំនួន ៤២ ៕
ប្រែសម្រួលៈ ណៃ តុលា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×