ព័ត៌មានអន្តរជាតិ

អាមេរិក នឹងបន្ដស្វែង រកកិច្ចចរចា ជាមួយកូរ៉េខាងជើង បើទោះជាទទួលបាន នូវការឆ្លើយ តបអវិជ្ជមាន

វ៉ាស៊ីនតោន ៖ អ្នកនាំពាក្យក្រសួង ការបរទេស បានបានឲ្យដឹងថា សហរដ្ឋអាមេរិក នឹងបន្តស្វែង រកការសន្ទនាជាមួយ ក្រុងព្យុងយ៉ាង ជុំវិញកម្មវិធីនុយក្លេអ៊ែរ របស់ខ្លួន បន្ទាប់ពីប្អូនស្រី របស់មេដឹកនាំកូរ៉េខាងជើង លោក គីម ជុងអ៊ុន បានទម្លាក់ការរំពឹងទុក របស់សហរដ្ឋអាមេរិក ចំពោះការបន្តកិច្ចពិភាក្សា រវាងប្រទេសទាំងពីរ ។

លោក Ned Price បានថ្លែងក្នុងសន្និសីទកាសែត ដោយប្រើពាក្យកាត់ នៃឈ្មោះផ្លូវការ របស់កូរ៉េខាងជើង ថា “យើងនៅតែត្រៀមខ្លួន ចូលរួមក្នុងការចរចារសំខាន់ ជាមួយកូរ៉េខាងជើង ដើម្បីដោះស្រាយបញ្ហាប្រឈម នៃកម្មវិធីនុយក្លេអ៊ែររបស់ខ្លួន” ។

លោកបានធ្វើការកត់សម្គាល់ នៅក្នុងការឆ្លើយតបទៅនឹងសេចក្តីថ្លែងការណ៍មួយ កាលពីថ្ងៃអង្គារ ដោយលោកស្រី គីម យ៉ូជុង ដែលជាជំនួយការជិតស្និទ្ធ របស់មេដឹកនាំកូរ៉េខាងជើង ផងដែរថាការរំពឹងទុក របស់សហរដ្ឋអាមេរិក សម្រាប់កិច្ចពិភាក្សាទ្វេភាគី អាចនាំមកនូវការខកចិត្ត។

អ្នកនាំពាក្យរូបនោះបានបន្ដថា “នៅពេលនិយាយដល់ យោបល់ ដែលអ្នកបានលើកឡើងមកពីប្រទេស កូរ៉េខាងជើង យើងបានឃើញពួកគេហើយយើង បានដឹងអំពីពួកគេ ។ ពួកគេមិនបានផ្លាស់ប្តូរទស្សនៈ របស់យើងលើការទូតនោះទេ” ។

លោកក៏បានបញ្ជាក់ម្តងទៀត នូវការផ្តល់ជូនរបស់សហរដ្ឋអាមេរិក “ដើម្បីជួបគ្រប់ទីកន្លែង គ្រប់ពេលវេលា ដោយគ្មានលក្ខខណ្ឌជាមុន” ដោយបន្ថែមថាទីក្រុង វ៉ាស៊ីនតោនបន្ត “សង្ឃឹមថាកូរ៉េខាងជើង នឹងឆ្លើយតបជាវិជ្ជមាន ចំពោះការផ្សព្វផ្សាយរបស់យើង” ។

ការផ្លាស់ប្តូរការឆ្លើយតបបាន ចាប់ផ្តើមបន្ទាប់ពីប្រព័ន្ធផ្សព្វផ្សាយរដ្ឋ របស់កូរ៉េខាងជើង បានរាយការណ៍ កាលពីថ្ងៃសុក្រថា លោកគីម ជុងអ៊ុនបានសន្យាថា នឹងរៀបចំសម្រាប់ទាំង “ការសន្ទនាគ្នា និងការប្រឈមមុខគ្នា” ជាមួយរដ្ឋបាល របស់ប្រធានាធិបតីអាមេរិកលោក ចូ បៃដិន៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×