បរទេស៖ ប្រជាជនប៉ាឡេស្ទីនរាប់រយនាក់ បានទាមទារឲ្យលោកប្រធានាធិបតី Mahmud Abbas លាលែងពីតំណែង នៅឯការតវ៉ានៅតំបន់ West Bank កាលពីថ្ងៃសៅរ៍ ដែលបណ្តាលមកពីការស្លាប់របស់សកម្មជនម្នាក់ នៅក្នុងមន្ទីរឃុំឃាំងកាលពីខែមុន។
យោងតាមសារព័ត៌មាន AFP ចេញផ្សាយនៅថ្ងៃទី៤ ខែកក្កដា ឆ្នាំ២០២១ បានឱ្យដឹងថា សាច់ញាតិរបស់លោក Nizar Banat ដែលបានស្លាប់បន្ទាប់ពីកងកំលាំងសន្តិសុខបានវាយលុកផ្ទះរបស់គាត់ ហើយចាប់ខ្លួនគាត់ដោយហិង្សា គឺស្ថិតនៅជួរមុខនៃការតវ៉ា នៅទីក្រុង រ៉ាម៉ាឡា ដែលអាជ្ញាធរប៉ាឡេស្ទីន (PA) របស់លោក Abbas តាំងនៅ។
ម្តាយដែលកំពុងកាន់ទុក្ខរបស់លោក Banat បានលើកបញ្ឈររូបថតកូនប្រុសរបស់គាត់។
ក្រុមអ្នកតវ៉ាបានយករូបភាពរបស់លោក Banat ដែលជាអ្នករិះគន់ពីអំពើពុករលួយនៅក្នុងអាជាធររបស់លោក Abbas ខណៈដែលអ្នកផ្សេងទៀត បានលើកបដាដ៏ធំមួយដែលកាន់ពាក្យឱ្យលោក Abbas ចាកចេញពីតំណែង៕
