ព័ត៌មានអន្តរជាតិ

រដ្ឋាភិបាលបណ្តោះអាសន្នហៃទី ស្នើសុំអាមេរិក ដាក់ពង្រាយកងទ័ព ហើយអង្គការសហប្រជាជាតិ ត្រូវធ្វើឱ្យប្រាកដអំពីសន្តិសុខ

បរទេស៖ រដ្ឋមន្រ្តីបោះឆ្នោតប្រទេសហៃទី លោក Mathias Pierre បានប្រកាសនៅថ្ងៃសុក្រថា រដ្ឋាភិបាលហៃទីបានស្នើសុំឱ្យ សហរដ្ឋអាមេរិក ដាក់ពង្រាយកងទ័ពទៅកាន់ ប្រទេសកោះនេះ ដើម្បីការពារហេដ្ឋារចនាសម្ព័ន្ធសំខាន់ៗ បន្ទាប់ពីរដ្ឋបាលលោក Biden បានផ្តល់ជំនួយដល់ប្រទេសនេះ ក្រោយពីការធ្វើឃាតប្រធានាធិបតីហៃទីលោក Jovenel Moïse។

យោងតាមសារព័ត៌មាន Sputnik ចេញផ្សាយកាលពីរាត្រីថ្ងៃទី៩ ខែកក្កដា ឆ្នាំ២០២១ បានឱ្យដឹងថា មុននេះទាំងមន្រ្តីអាមេរិកនិងហៃទី បានប្រាប់អ្នកយកព័ត៌មានថា ពួកគេមិនអាចបញ្ជាក់បានថាតើសំណើបែបនេះត្រូវបានធ្វើឡើងឬអត់នោះទេ ប៉ុន្តែនៅរសៀលថ្ងៃសុក្រ លោក Mathias Pierre បានប្រាប់កាសែត New York Times ថា “ភេរវករនៅតាមទីក្រុង” ដូចជាអ្នកដែលបានបាញ់សម្លាប់ប្រធានាធិបតីរហូតដល់ស្លាប់ នៅក្នុងផ្ទះរបស់គាត់ កាលថ្ងៃពុធ បានបង្កគ្រោះថ្នាក់ជាបន្ត ចំពោះទ្រព្យសម្បត្តិស៊ីវិល។

លោកបន្តថា “ ក្រុមដែលផ្តល់ហិរញ្ញប្បទាន ដល់ទាហានស៊ីឈ្នួល ចង់បង្កភាពវឹកវរក្នុងប្រទេស” ។ ការវាយលុកទៅលើការបំរុងហ្គាស និងព្រលានយន្តហោះ អាចជាផ្នែកមួយនៃផែនការ។ កងទ័ពក៏នឹងត្រូវបានស្នើឱ្យការពារកំពង់ផែ ព្រលានយន្តហោះ និងកន្លែងថាមពលផងដែរ។

ក្រោយមក លោក Pierre បានប្រាប់ CNN ថា ការស្នើសុំនេះគឺសម្រាប់ចំនួនកងទ័ពមានកំណត់ – ប្រមាណ ៥០០ នាក់៕

ប្រែសម្រួលៈ ណៃ តុលា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top