ព័ត៌មានអន្តរជាតិ

អាមេរិក បន្តបិទព្រំដែន ជាប់កាណាដា និងម៉ិកស៊ិក រហូតដល់ជាងពាក់ កណ្ដាលខែសីហា

បរទេស ៖ កំណត់ផ្លូវការនានា តាមសេចក្តីរាយការណ៍ បានបង្ហាញនៅថ្ងៃពុធសប្ដាហ៍នេះថា រដ្ឋាភិបាល សហរដ្ឋអាមេរិក នាពេលថ្មីៗនេះ បានសម្រេចចិត្ត បន្តបិទព្រំដែនជាប់ប្រទេស កាណាដា និងប្រទេសម៉ិកស៊ិក យ៉ាងហោចណាស់ ក៏រហូតដល់ថ្ងៃទី២១ ខែសីហាដែរ ។

ឯកសារបាននិយាយថា ការឆ្លងនៃមេរោគកូរ៉ូណា ពីមនុស្សទៅមនុស្ស ជាបន្តបន្ទាប់ និងហានិភ័យ ដែលបង្កឡើង ដោយមេរោគបម្លែងខ្លួនថ្មី បានបង្កើនហានិភ័យ នៃការឆ្លងមេរោគ ពាក់ព័ន្ធជាមួយនឹងជម្ងឺកូវីដ១៩ នេះបើតាមការចេញ ផ្សាយរបស់កាសែត UPI ។

ឯកសារដដែលនោះ បាននិយាយយ៉ាងដូច្នេះថា “ដោយសារតែការផ្ទុះឆ្លង និងការចម្លងរីករាលដាល ជាបន្ត នៃជម្ងឺកូវីដ១៩ នៅក្នុងសហរដ្ឋអាមេរិក និងសកលលោកនោះ រដ្ឋមន្ត្រីក្រសួង សន្តិសុខផ្ទៃ ប្រទេស លោក Alejandro Mayorkas បានសម្រេចថា ហានិភ័យនៃការបន្តឆ្លង និងរីករាលដាល នៃមេរោគ ដែលពាក់ព័ន្ធនឹងជម្ងឺកូវីដ១៩ រវាងសហរដ្ឋអាមេរិក និងកាណាដា បង្កឲ្យមានការគម្រាមកំហែង ជាក់ស្តែងកំពុងមាន ចំពោះអាយុជីវិតមនុស្ស ឬក៏ផលប្រយោជន៍ជាតិ” ។

តាមសេចក្តីរាយការណ៍មួយ ដែលចេញផ្សាយ ដោយទីភ្នាក់ងារ សារព័ត៌មាន UPI នៅថ្ងៃទី២២ ខែកក្កដា ឆ្នាំ២០២១ បានឲ្យដឹងថា ឯកសារស្រដៀង គ្នានេះមួយ ក៏ត្រូវបានចេញសម្រាប់ព្រំដែន ជាប់ប្រទេសម៉ិកស៊ិក ហើយឯកសារទាំងពីរ នឹងត្រូវចេញផ្សាយ នៅថ្ងៃព្រហស្បតិ៍ សប្ដាហ៍នេះ ៕ ប្រែសម្រួល៖ប៉ាង កុង

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top