ព័ត៌មានអន្តរជាតិ

អាមេរិក ត្រូវតែប្រព្រឹត្តចំពោះចិន ឲ្យស្មើភាពគ្នាមុនពេល ទំនាក់ទំនងទ្វេភាគី មានលក្ខណៈធម្មតាវិញ (Video)

ប៉េកាំង៖ សហរដ្ឋអាមេរិក ត្រូវតែប្រព្រឹត្ដចំពោះប្រទេសចិន ដោយស្មើភាពគ្នា បោះបង់ចោលការសម្លុត ធ្វើបាបប្រទេសចិន និងធ្វើអន្តរកម្មជាមួយប្រទេសចិន ដោយមានស្មារតីល្អ និងធម្មតា មុនពេលទំនាក់ទំនងទ្វេភាគី ឈានទៅមុខហើយសង្ឃឹមថា នឹងវិលមករកភាពប្រក្រតីវិញ។

នេះជាមេរៀនមួយ ដែលសហរដ្ឋអាមេរិក ត្រូវតែរៀនពីដំណើរទស្សនកិច្ច របស់អនុរដ្ឋមន្រ្តីការបរទេស សហរដ្ឋអាមេរិកលោកស្រី Wendy Sherman ទៅកាន់ប្រទេសចិន នាពេលថ្មីៗនេះក្នុងកំឡុងពេល ដែលកិច្ចពិភាក្សាស៊ីជម្រៅ និងស្មោះត្រង់ ត្រូវបានធ្វើឡើងរវាងលោកស្រី និងអ្នកការទូតជាន់ខ្ពស់ចិន រួមទាំងក្រុមប្រឹក្សារដ្ឋ និងជារដ្ឋមន្រ្តីការបរទេសចិនលោក វ៉ាង យី និងអនុរដ្ឋមន្រ្តីការបរទេសលោក ស៊ី ហ្វេង។

នៅពេលជួបជាមួយលោកស្រី Sherman លោកវ៉ាង យី បានគូសបញ្ជាក់នូវការ ទាមទារជាមូលដ្ឋានចំនួន ៣ ដែលជាមូលដ្ឋានគ្រឹះ ដែលប្រទេសចិនប្រកាន់ជំហររឹងមាំ គឺសហរដ្ឋអាមេរិក មិនត្រូវនិយាយបង្កាច់បង្ខូច ឬសូម្បីតែការប៉ុនប៉ងបង្វែរទិសដៅ និងប្រព័ន្ធនៃសង្គមនិយម ជាមួយនឹងលក្ខណៈរបស់ចិន។ មិនត្រូវព្យាយាមរារាំង ឬរំខានដល់ដំណើរការ អភិវឌ្ឍន៍របស់ចិនឡើយ។ ហើយមិនត្រូវរំលោភលើ អធិបតេយ្យភាពរដ្ឋរបស់ចិន ឬក៏ធ្វើឱ្យខូចខាតដល់បូរណភាពទឹកដី របស់ចិនផងដែរ។

យោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ បានឲ្យដឹងថា ទោះយ៉ាងណាក៏ដោយ វាមិនសមហេតុផលនោះទេ ក្នុងការដោះស្រាយភាពខុសគ្នា ជាមូលដ្ឋានរវាងប្រទេសទាំងពីរ យ៉ាងឆាប់រហ័ស។

ដើមហេតុនៃការជាប់គាំង និងការលំបាក ដែលមហាអំណាចចិន-អាមេរិក កំពុងប្រឈមផ្នែកទំនាក់ទំនង គឺថាអ្នកនយោបាយខ្លះនៅសហរដ្ឋអាមេរិក មើលឃើញប្រទេសចិន តាមរយៈការមើលឃើញចម្រុះពណ៌ ឬចាត់ទុកប្រទេសចិនថាជា “សត្រូវស្រមើស្រមៃ” ។

លើសពីនេះទៀត ដោយសារភាពខុសគ្នារវាងចិន និងសហរដ្ឋអាមេរិក លើមនោគមវិជ្ជា វប្បធម៌ និងប្រវត្តិសាស្ត្រ និងការពិចារណាលើទិដ្ឋភាពពិភពលោក ដែលមានការផ្លាស់ប្តូរយ៉ាងឆាប់រហ័ស គឺស្មុគស្មាញដោយជំងឺរាតត្បាតកូវីដ-១៩ វាពិបាកសម្រាប់ទំនាក់ទំនងទ្វេភាគី ដើម្បីកែលម្អយ៉ាងខ្លាំង សម្រាប់ពេលបច្ចុប្បន្ននេះ។

ផ្ទុយពីសហរដ្ឋអាមេរិក ប្រទេសចិន មើលឃើញទំនាក់ទំនង រវាងចិន-សហរដ្ឋអាមេរិក ដោយស្មើភាពគ្នា ជាមួយនឹងផ្នត់គំនិតវិជ្ជមាននិងបើកចំហ។

ប្រទេសចិនអភិវឌ្ឍខ្លួន ដោយគ្មានបំណងប្រកួតប្រជែង ឬជំនួសសហរដ្ឋអាមេរិក។ ដូចដែលរដ្ឋមន្ត្រីការបរទេសចិនលោក វ៉ាង យី បានលើកឡើងថា “យើងមិនមានការចាប់អារម្មណ៍ ក្នុងការភ្នាល់លើការឈ្នះ ឬការខាតបង់របស់ សហរដ្ឋអាមេរិកនោះទេ។ ការអភិវឌ្ឍរបស់ចិន មិនផ្អែកលើការសន្និដ្ឋាន នៃការធ្លាក់ចុះរបស់សហរដ្ឋអាមេរិកនោះទេ” ៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top